Pa kontrarestá falta di bibienda, munisipionan por obligá doñonan edifisio 

DEN HAAG—Situashon ekonómiko ta afektando e siudadano hulandes di tal forma ku premier Jetten a anunsiá desishon di Konseho di Minister pa oumentá suèldu mínimo di hóbennan. E promé minister hulandes a presentá den konferensia di prensa despues di e reunion di Konseho di Minister, manera ántes tabata e kaso na Kòrsou tambe.

Jetten a duna di konosé ku Konseho di Minister a tuma algun desishon, entre otro ku lo oumentá e suèldu mínimo pa hóbennan, entrante promé yanüari 2027. E gabinete ta nota ku hopi di e hóbennan ku ta dependé di e suèldu aki, no ta logra kubri nan nesesidatnan básiko. Pues ku e oumentu aki e gabinete ta sòru pa un mehorashon drástiko di e forsa di kompra di e hóbennan. Ademas ta oumentá e suèldu mínimo spesífikamente pa studiantenan PBL, ku ta esnan ku ta traha na un kompania ku ta instruí e hóbennan i nan ta bai skol únikamente un bia(1x) pa siman. Ta bai pone nan pago igual na otro hóbennan regular.

Otro desishon ku a kai ta duna munisipionan mas outoridat ora ta atendé ku doñonan di edifisio. Munisipionan asta por bai asina leu di obligá doñonan di kas i edifisio pa pone edifisio den uso. Manera ta konosí, tin hopi eskases di bibienda rònt Hulanda. Konseho di Minister a tuma desishon kaminda munisipionan por bai chek e uso di utilidat i asina por determiná e uso di edifisionan. Ku e kambio aki munisipionan por obligá doñonan di edifisio pa pone un edifisio den uso.

Mas aleu premier Jetten a bisa ku e konflikto na Iran tin su impakto riba Hulanda, Oropa i hinter mundu. Preisnan muchu mas haltu pa energia i un impakto enorme riba ekonomia. Jetten ta kere ku ta via di diplomasia mester logra kaba ku e akshonnan militar kontra Iran. E kombersashonnan ei mester kondusí ku ta logra apertura bèk di Homuz, sin ku e ta mará na kondishonnan.

Tin indikashon ku ta bai pa un apertura temporal, pero Jetten ke mira ku ta habri e kaya di Homuz kompletu. Mientrastantu ku no logra esei Oropa sigur lo sigui sinti e konsekuensianan. Konseho di Minister di Hulanda a deliberá riba e situashon i a konkluí ku mester aselerá e proseso di transishon di manera ku Hulanda ta ménos dependiente di e energia/petroli for di eksterior. Na di dos lugá  mester redusí e uso di gas i petroli, duna sosten na famianan i empresarionan ku ta sinti e efektonan mas tantu di e krísis. Jetten ta indiká ku lo deliberá ku algun partido den Tweede Kamer kon ta duna kontenido na e puntonan ariba menshoná.