WILLEMSTAD — Florin karibense a risibí otro rekonosementu internashonal, asina Banko Sentral di Korsou i Sint Maarten (CBCS) ta anunsiá. E rekonosementu ta bini di International Bank Note Society (IBNS) ku a skohe e biyete di 200 florin komo ‘Bank Note of the Year 2025’.

Na yüni 2025, CBCS a risibí un rekonosementu kaba. Esei tabata pa e serie di biyete kompleto i na mart di e aña aki, a bira konosí ku CBCS a gana e premio Central Banking Currency Manager Award tambe, relashoná ku e introdukshon eksitoso di florin karibense. Kada aña, IBNS ta otorgá e premio aki na e biyete mas distintivo na mundu for di e punto di bista di diseño, inovashon i siguridat. Ta mas di shen biyete nobo a keda emití rònt mundu den 2025, pero ta diesshete di nan so a keda nominá pa nan diseño inovativo.

For di prinsipio di e votashon, tabata bisto ku ta e biyete di 200 florin di Kòrsou i Sint Maarten tabata e faborito, loke ta hasi e rekonosementu aki asta mas spesial. Segun IBNS, e premio aki ta rekonfirmá e kalidat i nivel di inovashon haltu di diseño di e biyete. CBCS ta mira e rekonosementu aki komo un konfirmashon di e trayekto ku a sigui pa yega na un moneda moderno, sigur i hopi apresiá internashonalmente. E kompetensia di IBNS ta konosí internashonalmente komo un indikadó importante di e nivel di diseño di biyete. Si wak e otro ganadónan resien, ta bisto ku tantu e biyete su balor artístiko komo su nivel di inovashon teknológiko ta faktornan desisivo den e proseso di evaluashon. Promé finalista den e kompetensia aki tabata e biyete di 5 dòler di Fiji, ku ilustrashon di un para kulawai i un turtuga di laman. Riba e di dos finalista, e biyete di 100 kwacha di Zambia, por mira un águila i dos zjiraf.