WILLEMSTAD – Un siudadano di fam Winklaar, kende tin 32 aña di edat tabata djaluna 22 di aprel 2026 den sala di korte, akusá di vários akto kastigabel. Tur e aktonan tabata riba 2 di novèmber 2025. En total 4 akusashon tabatin kontra di Winklaar.

Pa kuminsá riba e fecha ariba menshoná Winklaar a agredí su partner, esta un otro siudadano di fam Rombley ku baranka di piedra den kabes, na wea di funchi i orea drechi. Den e ola di agreshon aki tambe Winklaar a parti algun moketa. Ademas Winklaar a maltratá un otro siudadano di fam Felipie. Mas aleu Winklaar a menasá e duo Rombley i Felipie, gritando ku lo e mata nan, asina ku e sali liber fo’i prizòn i topa nan den Otrobanda. E di kuater akusashon kontra di Winklaar ta destrukshon di e vehíkulo ku pa un parti ta pertinensia di Rombley.

Hinter e suseso aki ta relashoná ku e hecho ku Winklaar a tuma nota ku su partner Rombley lo tabatin un kontakto amoroso ku un tal Felipie. Winklaar a sinti su mes totalmente desfroudá i a bira furioso komo ku durante 2 aña el a yuda Rombley ku plaka, ku awor ta kòrtando su orea. Den sala di korte Winklaar a laga parse ku no tabata su intenshon pa agredí ni Rombley, ni Felipie, sino djis e tabata ke sa e bèrdat, pero finalmente e konfrontashon a sali totalmente for di man i desemboká den aktonan sumamente violento i agresivo. Mas aleu a bini padilanti, segun e abogado di Winklaar, señora mr. Joemmanbaks ku e deklarashonnan di Rombley i Felipie ta kontradiktorio. Na polis i serka dòkter Rombley lo a duna deklarashonnan diferente, esta ku e tabata drumí na soño i tambe ku e tabata sintá ta huma un ‘joint’. Mas aleu Rombley a deklará ku Winklaar a dal’e ku un baranka di piedra, siendo Felipie ta ninga ku Winklaar a dal ku piedra, sino simplemente a harta Rombley ku moketa .

E akusado Winklaar tambe a bisa ku ta ku moketa el a bati Rombley i ku ta dor di e moketanan aki Rombley a dal su kurpa na e porta di outo i heridá su kabes. Enfin, e suseso klaramente tin di aber ku Rombley lo tin un relashon amoroso ku Felipie, siendo Winklaar a reis riba e duo i tabata netamente e situashon di yalursheit ku a surgi, ta loke a kondusí na e problemanan violento i agresivo. No tin imágennan di kámara pa supstansiá loke a pasa presis. Abogado señora Joemmanbaks a relativá e kehonan di maltrato ku Rombley a trese padilanti, enfatisando ku e relato médiko no ta proba nada ku Rombley lo a bin sufri di dañonan físiko serio, por ehèmpel na kurason, garganta, pulmon, tripa òf na otro órganonan di importansia, te pa indiká ku ta maltrato pisá.

Abogado mr. Joemmanbaks a trata na tur sorto di manera pa desbaratá i òf relativá e akusashonnan kontra di su kliente Winklaar. Fiskal a sali for di e punto di bista ku un kastigu di prizòn di 240 dia di kua 202 dia kondishonal i un periodo di prueba 3 aña ta sufisiente pa e akusado. Pero huntu ku esei lo mester tin guia profeshonal di parti di Reclassering, sikólogo i sikiater eventualmente. Wes señora mr.N. H. Engelbrecht a yega na un kondena muchu mas moderá pa Winklaar, pasobra den bista di e wes akí ta solamente 2 hecho kastigabel ta probá, maltrato di Rombley i destrukshon di e outo, pero pa loke ta destrukshon di e vehíkulo, mester tene kuenta ku e vehíkulo por parti ta pertinensia di Winklaar tambe, pasobra el a paga pa kumpra e outo aki. E kondena di wes señora mr. Engelbrecht a bira 180 dia di kua 141 dia kondishonal, kitando loke ku a pasa kaba den aresto preventivo. Winklaar mester aseptá guia di Reclassering, ademas ta prohibí pa Winklaar mantené kontakto ku Rombley. E demanda di daño i perhuisio di parti di Rombley no ta sufisientemente supstansiá, pues ta keda konsiderá komo no atmisibel. Solamente 500 florin pa daño i perhuisio inmaterial ta aseptabel.

Erwin Raphaëla