Willemstad/Philipsburg.- Hunta di Komisario di Centrale Bank van Curaçao en Sint Maarten (CBCS) ta anunsiá ku Richard Doornbosch a disidí di baha for di su funshon komo presidente di CBCS entrante 1 di sèptèmber 2026, pa aseptá un funshon nobo pafó di e organisashon i pafó di Kòrsou i Sint Maarten.

E proseso pa sigurá un susesor adekuá a wòrdu inisiá mesora. Al mes momento, e proseso di reklutamentu pa yega na un direktor finansiero ekonómiko nobo ta den un fase avansá i lo wòrdu aliniá ku e proseso anteriormente menshoná. Mas komunikashon tokante tur dos nombramentu lo sigui na su debido tempu.

Hunta di Komisario ta ekspresá su apresio pa señor Doornbosch su dedikashon i e kambionan signifikativo ku el a realisá. Hunta di Komisario ta reafirmá ku Doornbosch lo sigui ehersé su trabou ku dedikashon te ora di su salida for di servisio.