Splikashon di Mi Kas Awor pa Ombudsman

WILLEMSTAD— Fundashon Kas Popular a duna Ombudsman i su tim, splikashon ekstenso di e proyekto Mi Kas Awor durante di un presentashon detayá. Mi Kas Awor ta e programa nobo di supsidio pa fasilitá kompra di kas propio.

Despues di e presentashon, a sigui un interkambio valioso tokante aksesibilidat, transparensia, trato hustu i protekshon di derechonan di kada hende ku ta apliká pa bini na remarke pa un kas.

Ombudsman sr. Concincion i su kolega a aportá ku opservashonnan importante, basá riba nan eksperensia i e kehonan, tambe e señalnan ku siudadanonan ta presentá na e instituto. E aporte aki ta yuda fortalesé e programa i pone e eksperensia di e siudadano sentral den su implementashon.

FKP ta mustra ku den kuadro di e proyekto Mi Kas Awor nan ta sigui dialogá ku institutonan klave pa logra un programa aksesibel, hustu i transparente pa famianan di Kòrsou.