SUR AFRIKA – Preparashonnan ta tumando lugá pa e aña aki ainda landa un sistema di pago digital nobo. Ta trata di e sistema BRICS PAY, asina e paisnan ku ta forma BRICS a anunsiá. E anunsio aki ta surgi nèt den un momentu di tenshon mundial.

BRICS ta un grupo geopolítiko di hopi influensia ku ta bini di ekonomianan emergente, ku ta sirbi un plataforma polítiko, ekonómiko i di koperashon sosial di nashonnan global di Sur.

Segun analistanan, un sistema di pago los for di dòler merikano sigur lo nifiká un reto pa e moneda merikano. E paisnan den e aliansa BRICS a anunsiá ofisialmente nan plannan pa lansa BRICS PAY den 2026. Esaki ta un sistema di pago digital diseñá pa bypass e sistema mundialmente usá SWIFT. A Kòrsou tambe kada transakshon digital por tuma nota ku ta via e sistema SWIFT.

Ekspertonan ta mustra ku e sistema BRICS Pay lo permití tur pais miembro di BRICS pa realisá transakshonnan finansiero den nan propio moneda. Esei lo nifiká redukshon formal di e dependensia di dòler merikano.

Brics ta un grupo formá pa 11 pais kualnan ta Brasil, Rusia, India, China, Sur Afrika, Arabia Saudita, Emiratonan Árabe Uni, Etiopia, Indonesia i Iran. E grupo inisialmente tabata konsistí di Brazil, Rusia, India, China i Sur Afrika. Na desèmber 2025 Brasil, ku tabata e presidensia di Brics a pasa esaki pa India.

Den otro informe ku ta trata Brics ta asina ku Fransia, Reino Uni, Rusia, China i Alemania a laga nan bos resoná, mustrando nan opheshon fuerte kontra di e kampaña militar merikano kontra di Iran. Na opinion di e paisnan menshoná, e guera aki ta destabilisá komersio internashonal.