WILLEMSTAD – E kuater siudadanonan di inisialnan D.C (23 aña), K.D (24 aña), A.D (23 aña) i S.O (38 aña) tabata den sala di korte, djaluna 20 di aprel, akusá di ladronisia di 14 televishon nòps, nòps na hotèl Corendon Mangrove Beach Resort. Ta trata aki di televishonnan di 55 inch marka Philips. E ladronisia aki a tuma lugá dia 29 di mart 2025 den oranan di anochi (pa mas of ménos 22.15or). Dos di e ladronnan, esta A.D i S.O na e momento ei ainda tabata den servisio di Corendon.

Ámbos tabatin e trabou di vigilante i tabata kana tirando un bista riba e tereno di Corendon i a tuma nota ku porta di mangasina tabata habrí. Den mangasina tabatin televishonnan nobo poné ta warda pa keda instalá. E dos trahadónan akí, esta A.D i S.O mesora a disidí pa kada un di nan yama un konosí di nan pa transportá e televishonnan aki bai kuné for di e mangasina. A.D a para na porta warda pa garantisá ku ta laga e transporte pasa bai sin ningun estorbo. Remarkabel den e kaso aki ta ku pa S.O ya e dia ei tabata su último dia di trabou na Corendon, pasobra el a solisitá i aseptá un otro trabou na un otro empresa.

Fiskal señora mr. E.  van der Zee a puntra si e hecho aki, ku tabata su último dia di trabou aya na Corendon, tabata e rason pa S.O., ranka kibra i hòrta tur opheto ku presentá den su kaminda, pasobra S.O pa kolmo ta esun ku a laga hisa 9 di e televishonnan bai kuné. Anto netamente den e kaso di S.O., no a haña ningun di e aparatonan aki bèk, kontrali na A.D. ku a duna full koperashon den e envestigashon ku a tuma lugá di parti di hustisia. Hopi remarkabel ta ademas ku durante tratamentu di e kaso den korte, S.O. a demostrá di ta un hende muhé hopi skèrpi na palabra, el a biba algun tempu na Ulanda i tin yu aya. Mas aleu a bini padilanti ku a hasi hopi esfuerso pa gana S.O na e trabou aki (di Ulanda pa Kòrsou), pa awor resultá ku e ta saka su uña di tal forma. Pa kuminsá e dos akusadonan S.O. i A.D klaramente tabata benta falta riba otro, pero tabata A.D. ku a hasi e yamada telefóniko na K.D., pa e kore yega Corendon ku su pikòp koló kòrá pa transportá 5 di e televishonnan. E akusado K.D sa tin e kustumber di kue djòp ku su pikòp, segun su abogado mr. Loth a duna di konosé. Pero manera e akusado mes a atmití, e tabata sa for di adelantá ku e djòp akí tabata pa kometé un akto di ladronisia. S.O. tambe a perkurá pa transporte!

Wes mr. Sigmar Carmelia tabata hopi eksakto ku preguntanan dirigí na e akusadonan ku tabata envolví den e ladronisia, konkluyendo alabes ku nan por tabata sa adelantá ku nan lo keda gará, pasobra awendia tin kámaranan instalá práktikamente tur kaminda na Kòrsou.

Tabatin un diferensia grandi den e komportashon di e akusado S.O kompará ku A.D., ounke ámbos a sera kabes pa start ku e ladronisia aki. S.O a desplegá e komportashon di ta un siudadano hopi terko i kabesura. Tur kuater persona ta ‘firstoffender’, solamente S.O. a yega di tabatin un kaso di pagamentu di but den pasado, kaminda na aña 2011 el a ofendé un amtenar den funshon.

Apart di e kaso di ladronisia e akusado A.D tabatin un kaso mas pa atendé den sala di korte, anto esei tabata pa maltrato di su partner dia 21 di novèmber 2025. E partner a hasi denunsia i a deklará ku A.D a dal’e moketa den boka, siendo segun A.D ta un pushamentu tabatin, kaminda su elebog a resultá den e víktima su kara. Wes mr. Sigmar Carmelia a rekonosé ku e señora en bèrdat, di akuerdo ku rapòrt médiko, tabatin un fraktura na su boka, pero no tin prueba ku ta trata di dalmentu ku moketa òf ta debí na pushamentu. Pues wes a deklará A.D. liber di e akusashon di maltrato.

Fiskal señora E. van der Zee, enfatisando prinsipalmente e hecho ku e dos vigilantenan a desfroudá e konfiansa di nan dunadó di trabou, a bisa ku aki sigur no ta un kaso leve. Ladronisia di 14 televishon di 55 inch ku a kosta en total 6500 euro ta algu hopi serio i esei a sosodé partí den dos grupo, un grupo ku a hòrta 5 televishon (ku e akusado A.D. na kabes), siendo e otro grupo a bai ku 9 televishon en total (anto aki e akusado S.O tabata na kabes). E nuebe televishonnan ku S.O a laga bai kuné, nunka mas a sa na unda nan ta!!!

E fiskal, na nòmber di Ministerio Públiko, a demandá e siguiente kastigunan:  Pa e akusado S.O un kastigu di trabou di 240 ora di kua 6 luna kondishonal, mará na un periodo di prueba di 3 aña. Ta kita for di e kastigu di trabou e periodo ku S.O a sinta kaba den prizòn, balorá na kantidat di ora. Pa A.D., kende a kolaborá bon ku hustisia, fiskal van der Zee a demandá 220 ora kastigu di trabou, mará na 6 luna kondishonal i un periodo di prueba di 3 aña. Den e kaso aki tambe ta kita for di e oranan di trabou debí ku A.D. a pasa un periodo den prizòn. Pa e otro komplisenan D.C i K.D fiskal a demandá 180 ora kastigu di trabou di kua 4 luna kondishonal i un periodo di prueba di 3 aña. Pero ta kita for di e oranan di trabou pasobra ámbos tambe tabata enkarselá. E abogadonan ku a hiba palabra, asistiendo e akusadonan tabata señora mr. Tromp, señor mr Alejandra, señor mr. Loth, señor mr. Dickens i señora mr. Joemmanbaks.

E Veredikto final a bini ku kastigunan mas leve.

Tur e akusadonan a pidi diskulpa i a primintí di lo no hasi nan mes kulpabel na ningun akto kastigabel mas. Wes mr. Sigmar Carmelia a sera e kaso ku e siguiente veredikto: Pa S.O un kastigu di trabou di 200 ora, sino 100 dia será, mas 4 luna kondishonal i un periodo di prueba di 3 aña i akí ta deskitá algun ora, balorá na e dianan ku e tabata den prizòn kaba. Pa e akusado A.D 180 ora kastigu di trabou, sino 90 dia será den prizòn i un periodo di prueba di 3 aña i for di e kastigu di trabou ta deskitá algun ora.Kuater luna kondishonal pa A.D. Pa e dos otro komplisenan D.C i K.D, wes a dikta e kastigu di trabou di 150 ora, sino 75 dia den prizòn, mará na un periodo di prueba di 3 aña i 2 luna kondishonal i akí tambe ta kita algun ora di trabou, pasobra nan tabata será kaba pa e akto kastigabel kometé.