Mi a tende gobièrnu deklará ku ta ban traha riba kombatimentu di pobresa na Kòrsou. Di bèrdat mi ke pa e intentonan ta serio, pero mester ta ku determinashon. Mi tin e impreshon ku gobièrnu a skohe pa e trayekto ku Nashonnan Uni a rekomendá for di aña 2015 ku yama Desaroyo Sostenibel.

E metanan di Desaroyo Sostenibel (SDG), ta basá riba 17 meta mundial di Nashonnan Uní pa kaba ku pobresa, protehá e planeta i garantisá prosperidat pa tur hende pa aña 2030, ku enfoke riba sostenibilidat sosial, ekonómiko i ambiental. E metanan aki en realidat ta kubri tópikonan manera kombatimentu di pobresa, seguridat di kuminda, salú, edukashon, igualdat di género, awa limpi, energia limpi, trabou desente, inovashon, redukshon di desigualdat, siudat sostenibel, akshon pa klima i pas ku hustisia. Ademas e metanan aki ta konektá ku otro i ta eksigí koperashon mundial.

Pa ta mas eksakto e 17 SDG-nan ta:  

1. Sin pobresa: Kaba ku pobresa den tur su formanan, tur kaminda.  
2. Nada di hamber: Kaba ku hamber, promové seguridat di kuminda i mihó nutrishon i stimulá agrikultura sostenibel.  
3. Bon salú i bienestar: Garantisá bida saludabel i promové bienestar pa tur edat.  
4. Edukashon di kalidat: Promové edukashon di kalidat inklusivo i igual pa tur hende i oportunidat pa siña henter bo bida.  
5. Igualdat di género: Logra igualdat di género i empoderá tur muhé i mucha muhé.  
6. Awa limpi i kombiná ku sanidat: Sigurá disponibilidat i maneho sostenibel di awa i un grado haltu di sanidat pa tur hende.  
7. Energia pagabel i limpi: Sigurá akseso na energia pagabel, konfiabel, sostenibel i moderno pa tur hende.  
8. Trabou desente i kresementu ekonómiko: Promové kresementu ekonómiko sostenibel i inklusivo, empleo kompleto i produktivo i trabou desente pa tur hende.  
9. Industria, inovashon i infrastruktura: Konstruí infrastruktura resiliente, promové industrialisashon inklusivo i sostenibel i stimulá inovashon.  
10. Ménos desigualdat: Redusí desigualdat den i entre paisnan.  
11. Siudat i komunidat sostenibel: Hasi siudatnan i otro partinan di pais humano i inklusivo, sigur, resiliente i sostenibel.  
12. Konsumo i produkshon responsabel: Garantisá patron di konsumo i produkshon sostenibel.  
13. Akshon pa mantené kalidat di klima: Kombatí kambio di klima i su konsekuensianan.  
14. Bida den awa: Usa oséano, laman i rekursonan marino di forma sostenibel.  
15. Bida riba tera: Protehá, restourá i usa ekosistema terestre di forma sostenibel.  
16. Pas, hustisia i institutonan fuerte: Promové sosiedat pasífiko i inklusivo, duna akseso na hustisia i konstruí institutonan efektivo, responsabel i inklusivo.  
17. Aliansa pa logra e metanan: Fortalesé medionan di implementashon i rebibá e aliansa pa desaroyo sostenibel.