Gasolin, gasoil i koriente ta bira mas karu

WILLEMSTAD— Entrante otro siman djamars 1 di sèptèmber preis di kombustibel ta kambia na Kòrsou. Esaki ta konta tantu pa gasolin komo gasoil, asina Regulatory Authority Curaçao (RAC) ta informá. E tarifa di elektrisidat ta subi entrante djamars 1 di sèptèmber miéntras ku e tarifa di  awa si ta baha.

E preis di gasolin Mogas ta aktualmente Cg 2.54 pa liter i esaki ta bira Cg 2.597 pa liter. Gasoil ta kosta aktualmente Cg 2.134 pa liter i lo bira Cg 2.373 pa liter. E preis di gas pa kushina ta keda 80 florin pa bòm di gas di 100lb i 16 florin pa bòter di gas chikí di 20lb.

RAC ta splika ku e tarifa final pa usuario pa tantu Mogas 95 komo Gasoil (U)LSD ta subi kompará ku luna anterior, prinsipalmente komo resultado di preisnan di kompra internashonal mas haltu. En partikular, tin un oumento signifikante den e preis internashonal di kompra di Gasoil (U)LSD, prinsipalmente pa motibu di e kapasidat di refinamentu limitá na mundu. Pa mitigá e impakto di e oumento aki, a usa e surplus disponibel pa Gasoil (U)LSD ku ta reflehá komo un komponente di surplus/défisit negativo. Ta sperá ku e surplus aki lo keda apsorbá kompletamente pa final di sèptèmber 2026. Despues di esaki, e komponente di surplus/défisit lo bira ménos negativo òf posiblemente positivo, i komo resultado lo tin un efekto kresiente riba e preis pa e siguiente lunanan. E tenshon geopolitiko ta sigui kousa insertidumbre den e merkadonan internashonal di energia.

Tin un subida den e gastunan promedio di kombustibel pa produkshon di elektrisidat, kombiná ku un subida leve den e faktor di korekshon pa e luna di yüli 2026, ku ta resultá den un subida den e tarifanan di elektrisidat. E bahada den e tarifanan di awa ta resultado di un subida den e gastunan di elektrisidat pa produkshon di awa i un faktor di korekshon mas abou pa e luna di yüli 2026.