WILLEMSTAD—Den sala di korte lo mester tabatin djabièrnè 22 di mei último tratamentu di e kaso di tata i yu Anita. E duo akí ta keda akusá di trafikashon di hende (kontrabanda) durante e periodo yanüari 2017 pa novèmber 2023.

Entre e dokumentonan ofisial di Ministerio Públiko tin un lista largu di nòmbernan di esnan konsiderá víktima di e fenómeno kastigabel akí. Ademas tin algun deskripshon tokante transportashon i alokashon di esnan konserní, kontaktonan telefóniko ku lo mester a tuma lugá, instrukshonnan duná na aeropuerto i otro trámitenan importante, manera reglamentu di tiket pa buelo. Ta trata di siudadanonan di orígen sea venezolano òf kolombiano. Dia 20 di yanüari 2025 e kaso akí lo mester a keda tratá estilo proforma kaba, pero awor ta yegando e momento pa tratamentu riba kontenido.

Esun enkargá ku dirigimentu di e sekshon akí ta wes señora mr. M.C.B Hubben, kende normalmente sa atendé ku kasonan sivil i no penal, anto di parti di Ministerio Públiko ta señora mr. Monique Dennaoui-Simon.

Segun e abogadonan mr. B. Lie Atjam i mr. A. Herrera e wes a kometé un fayo dor di bisa Ministerio Públiko adelantá den un email ku e ta sinti falta di algun dokumento hopi importante pa por trata e kaso. Den bista di e abogadonan e tipo di opservashonnan akí no ta korekto ya ku ta solamente dor di wes komisario esaki por sosodé. Mas aleu segun e abogadonan no ta ferwagt tampoko ku wes ta koregí e dokumento di defensa di ningun abogado (e asina yamá pleitnota).

Promé ku tratamentu di e kaso akí tabatin spekulashon kaba ku e tratamentu akí lo no kontinua, pasobra tin algu robes andando. Pero den sala di korte por a tuma nota kon a sigui ku rekusashon di e wes, di manera ku e kaso a para pa tempu indefiní.