WILLEMSTAD – Den sala di korte a presentá djarason 17 di yüni 2026, e duo J. Pietersz (40) i su señora G. Mathilda (36), akusá di transportashon ilegal di hende fo’i Venezuela riba laman i trafikashon di droga atraves di gulidónan di bolita, inkluso plantamentu di planchinan di mariwana.

E akusado Pietersz tin ya kaba 9 luna será, siendo su señora a keda den libertat temporalmente dia 21 di òktober 2025. En prinsipio a kuminsá ku e investigashon rondó di transportashon di 24 venezolano ilegal pa Kòrsou di kua un kantidat grandi a muri hogá riba laman i tabata na altura di Santa Martha e insidente akí a kulminá. Loke a sosodé akí tabata rondó di e fecha 4 di mart 2025, despues ku Wardakosta a risibí e notisia ku un boto lo a bòltu riba laman brutu ku venezolanonan na bordo (yola). Ta un notisia ku a zona den hinter Kòrsou. Helikopter a transportá 6 di e hendenan akí den hopi mal estado tantu físiko komo mental hiba hospital, pero un di nan a muri na kaminda.

E siudadano Pietersz ta metí den e asuntu akí di transportashon ilegal di venezolanonan, pasobra e lo tabata enkargá ku duna guia na e hendenan akí asina nan pisa suela di Kòrsou. Enfin, investigashon a start rondó di Pietersz pa wak presis kiko e tin di haber ku transportashon ilegal di venezolanonan pa Kòrsou. Ta trata aki di e kaso ku a haña e nòmber ‘Pesadilla’, pero entre tantu outoridatnan a bin reis riba e hecho ku Pietersz huntu su señora di fam Mathilda ta atendé tambe ku trafikashon di droga pa Oropa.

A bin skucha telefòn i outoridatnan a bin sa di komunikashon entre Pietersz i su kasá Mathilda ku siudadanonan ku tabata guli bolita i hiba Europa, moviendo riba avionnan di TUI. Hopi kòmbersashon tabatin di parti di Pietersz pa regla ticket i estadia pa e gulidónan di bolita. Nòmber di gulidónan di bolita ku a keda menshoná durante di e investigashon ku a tuma lugá ta entre otro Victoria i Belioso. Ta e nòmbernan akí a kai den e investigashon di Ministerio Públiko i kendenan ta aparesé den e fail produsí. Headman den e kordinashon di e asuntu di gulimentu di bolita tabata Pietersz, kende tabata gosa di sosten i apoyo di su señora Mathilda.

Fiskal señora mr. K. Hara a para ampliamente ketu na e resultadonan di e investigashonnan hasí, ku ta proba klaramente ku tantu Pietersz komo Mathilda ta karga kulpa pa e aktonan kastigabel kometé. E abogado enkargá ku e defensa di e duo Pietersz i Mathilda ta señora mr. A. Tromp, anto e wes ku a trata e kaso akí ta señora mr. Groenendaal. Pa Pietersz fiskal a demandá un kastigu di prizòn di 6 aña i pa Mathilda 20 luna di prizòn di kua 6 luna kondishonal. E kastigunan ta mará na un periodo di prueba di 3 aña. Wes mr. Groenendaal a tene un pousa kòrtiku pa bai pensa i òf tuma e desishon si e lo por dikta sentensia dirèkt. Na momento ku wes a drenta sala bèk el a partisipá ku dia 7 di yüli binidero pa 13.or lo e dikta sentensia, pero lo ta despues di a kaba di repasá tur dokumento, inkluso tur informashon balioso ta enserá defensa di abogado, reakshonnan di e akusadonan i punto di bista di fiskal, na nòmber di Ministerio Públiko. All by  all ta akí 3 siman e sentensia lo kai.