WILLEMSTAD – Un siudadano di fam Obispo, kende tin 22 aña di edat tabata djabièrnè 8 di mei último den korte pa tratamentu di su kaso proforma. Obispo ta akusá di menasa ku arma di kandela, esaki lo a sosodé dia 14 di yüni 2025 kontra di un siudadano di inisial N.A.

Segun dokumentonan di Ministerio Públiko, Obispo lo a menasá su frei N.A. ku e arma di kandela i ademas a lòs algun tiru ku e arma di kandela den laira. Komo tal e ta akusá tambe di posishon di arma di kandela.

Mas aleu e dokumentunan ta papia di posishon di arma di kandela, durante e periodo 14 di yüni 2025 pa 2 di ougùstùs 2025. Pa defendé e kaso di Obispo, tin abogado mr. Ulrich Dickens, siendo na nòmber di Ministerio Públiko a hiba palabra fiskal señora mr. V. Girigoria-Hernandez. Wes a splika ku di e kuater testigunan ku a keda skuchá, falta un mas pa tende, pero aki Obispo a zona bastantei rabiá, bisando ku ta pone un teribel preshon riba testigunan, di kua unu a deklará kosnan ku apsolutamente no ta bèrdat.

Mas aleu Obisipo di un forma hopi desgustá a sigui bisa ku ta trat’é malu, siendo e ta un modelo pa hubentut. Tin promoshon importante den sirkulashon pa aktuashonnan na fiesta ku e tin pendiente. ‘Mi no ta komprondé pakiko ta sigui perhudiká mi’, Obispo a bisa den sala di korte. ‘Ami ke pa skòrs mi detenshon’, anto aki wes mr. Foppen a reakshoná, bisando ku korte no tei pa tene ningun hende será sin motibu. Den e kaso di Obispo, segun wes tin argumentonan bálido den Obispo su kontra i ademas falta un testigu mas pa kaba di hasi deklarashon enkuanto di Obispo. Wes a sigui splika ku komunidat di Kòrsou ta den problemanan serio, pasobra tin hopi arma ilegal den sirkulashon ku ta hasi ku kontinuamente susesonan teribel ta tuma lugá.

Obispo ta den su periodo di prueba, anto até atrobe den man di hustisia. Mas aleu segun fiskal señora mr.V. Girigoria-Hernandez, no tin ningun motibu personal di peso pa hustifiká libertat temporal di Obispo. E petishon pa skòrs detenshon di Obispo ta keda rechasá i esei ke men ku Obispo mester sinta trankil den prizòn warda e fecha pa tratamentu di su kaso yega.