WILLEMSTAD – Dos mucha hòmber di fam Hansen i di inisialnan J.R.Z (29 aña di edat) i J.J.E (23 aña di edat), huntu nan tata S.R. (48 aña di edat) mester a presentá den sala di korte djaluna 11 di mei 2026, akusá di a maltratá un siudadano di fam Gijsbertha. E maltrato aki lo tabata dia 18 di òktober 2024. Nan lo mester a tene e hòmber aki, lastr’é na porta di un negoshi i dal e algun moketa, tené den grep, batié mal batí na kabes, den kara, den lomba i na otro partinan di su kurpa. Tratamentu di e kaso no por a tuma lugá, pasobra abogado mr. E Wilsoe a haña e dos yunan hòmber komo kliente pa defendé nan kousa den korte. E abogado mester di tempu pa studia fail i tur e dokumentonan konserní. Wes mr. Sigmar Carmelia a skucha e argumentonan ku a subi mes i a primintí di lo reservá un fecha pa tratamentu di e kaso mas pronto posibel. Tantu fiskal señora E. van der Zee komo e abogado  mr. E. Wilsoe a bai di akuerdo ku e proposishon di wes mr. Sigmar Carmelia.