WILLEMSTAD – Fondonan di penshun ta forma un parti hopi importante di sistema finansiero di Kòrsou i Sint Maarten, ku aktiva total di mas ku 9.5 bion florin na final di 2024, asina Banko Sentral di Kòrsou i St.Maarten ta informá. E sektor di fondonan di penshun ta representá mas ku 102% di Produkto Interno Bruto di e union monetario di e dos paisnan. Un análisis nobo di CBCS ta mustra ku, apesar ku fondonan di penshun tin un posishon finansiero fuerte aktualmente, turbulensia den merkadonan finansiero mundial por tin un impakto serio riba nan solvabilidat. Riesgo di tasa di interes i kaida den merkado di akshonnan ta konsiderá entre e menasanan prinsipal pa e sektor.

Den e senario severo di un krísis finansiero mundial, e buffer finansiero di fondonan por baha te bou di e nivel di supervishon di 100%. En kambio, un reseshon lokal lo tin un impakto mas limitá, ounke CBCS ta indiká ku mester sigui mónitòr rísiko djaserka.

CBCS ta splika ku fondonan di penshun ta forma un parti importante di sistema finansiero di Kòrsou i St. Maarten. Global Financial Stability Note di IMF ta resaltá ku sektor di fondonan di penshun a bira un segmento importante den sistema finansiero mundial, loke ta hasi ku ta nesesario pa mónitòr na un forma adekuá di riesgo i ku supervishon fuerte. Ademas, serie di dokumentonan di trabou di IOPS tokante supervishon efektivo di penshun a indiká ku supervisornan di penshun ainda tin un kaminda largu pa nan yega na mes nivel ku sektor bankario i di seguro, pasobra solamente 40% di outoridatnan di supervishon den hurisdikshonnan di IOPS ta usa “stress test.”

Fondonan di penshun den union monetario ta enfrentá vulnerabilidatnan struktural pa motibu di e garantianan ku ta eksistí. Mas o ménos 86.2% di e obligashonnan total di penshun ta bini for di plannan di benefisio definí, miéntras ku aproksimadamente 13.4% ta pertenesé na plannan di kontribushon definí ku un retorno garantisá.

E tipo di “stress test” mas komun pa plannan ku benefisio òf retorno garantisá ta test di solvabilidat, ku tin komo meta pa evaluá si fondonan di penshun tin sufisiente fondo pa por kumpli ku nan obligashonnan den kaso di situashonnan desfaborabel.

Den kuadro regulatorio di CBCS pa fondonan di penshun, e rekerimentu di solvabilidat ta un ratio di finansiamentu di por lo ménos 100%. Sin embargo, pa monitoreo di alerta tempran, un márgen di solvabilidat ta ser konsiderá den stress testing, reflehando un ratio di finansiamentu di por lo ménos 104%.

CBCS ta suprayá e importansia di “stress test” regular, bon maneho di aktiva i obligashonnan, i supervishon kontinuo pa protehá stabilidat finansiero i sigurá ku fondonan di penshun por kumpli ku nan obligashonnan den futuro.