WILLEMSTAD –  Otro kaso tratá den sala di korte kaminda strañero ta metí, ta esun di e siudadano di fam Benito, kende ta nasé na Repúblika Dominikana i tin 57 aña di edat, pero ku tabata burachi, siendo e tabata manehá un outo Hyundai Matos ku e plachi di number F 72-79. E akusado Benito, mesora ku polisnan a yega na e sitio, kaminda el a dal outo dia 19 di òktober 2025, a rekonosé ku algun ratu promé el a para dal vários beter na e snèk ‘Mi Lucha’, aya na Santa Maria/ Winston Churchillweg. Por lo ménos 5 serbes el a dal, segun su deklarashon na polis.

E hòmber akí a resultá di ta un firstoffender. El a presentá den sala di korte ku señora mr. Maribel Gomes komo e abogado pa defendé su kaso. Benito pa motibu di a kore outo burachi a pèrdè su reibeweis for di e dia ei, pasobra e prueba ku el a hasi a marka 595 micogram. Den sala di korte wes i fiskal a repasá huntu ku Benito kiko mas lo por a sosodé kuné, siendo burachi den tráfiko. E por a hañ’é den un aksidente grave ku morto komo resultado òf kaminda e mes i otronan ta keda gravemente heridá. Den e kaso akí ta djis algun daño tabatin na e vehíkulo. Benito lo mester sa di kasonan teribel ku a tuma lugá den tráfiko den pasado, wes a trese padilanti. E akusado, despues di a skucha,  mesora a reakshoná, bisando ku for di e dia ku polisnan a gar’é burachi, ningun momento mas e no a kore outo bou di influensia di alkohòl. Fiskal a primintí ku Benito lo haña su reibeweis pronto bèk. Normalmente lo mester sigui un but di entre 1500 pa 1600 florin, pero fiskal señora mr. Scheer a tene konsiderashon ku e situashon finansiero pésimo di Benito i a demandá un kastigu di trabou di 80 ora di kua 20 ora kondishonal, mará na un periodo di prueba di 3 aña. Ademas e lo mester sigui un kurso ku ta konsentrá riba komportashon den tráfiko bou di ouspisio di Reclassering. Wes mr. P.M. Leijten a skucha i a konkluí finalmente ku un kastigu di trabou di 80 ora di kua 40 ora kondishonal ta loke Benito meresé. Pero, e akusado mester someté su mes na guia di Reclassering, respektivamente sigui un kurso riba komportashon den tráfiko. Ta bini aserka ku e kastigu ta mará na un periodo di prueba di 3 aña.