WILLEMSTAD – Den sala di korte a presentá e siudadano di fam Netten, kende tin 43 aña di edat i ta nasé na Ulanda. Tabata dia 18 di novèmber 2025 ku Netten a manehá un Mini Cooper ku e plachi di number T 93-66, koriendo riba Kaya Boy Nicolina di forma imprudente, a kousa un aksidente ku konsekuensianan ferfelu pa esun ku Netten su vehíkulo a dal den dje. Pa kolmo Netten tabata bou di influensia di alkohòl di manera ku el a bai dal den un Kia Rio ku e plachi di number F 55-69 riba e banda kontrali di kaminda. Shofùr di e outo Kia Rio a sufri tantu daño material na e vehíkulo komo daño personal, di bastante gravedat. E señora, shofùr di e Kia Rio ainda ta bou di tratamentu spesial, mester a keda operá i entre tantu ta pasando den e proseso di revalidashon.

Outoridatnan ku a presentá na e sitio di aksidente, despues di a atendé ku e shofùr N. a konstatá ku esaki a skor 595 microgram di alkohòl pa e tèst ku el a keda someté na dje, esta dòbel di e kandidat di 220 microgram ku ta pèrmití den tráfiko riba kamindanan públiko. Hopi lihé a tuma nota ku N. tabata mal bebé, pasobra holó fuerte di alkohòl tabata sali for di su boka. Apart di kousa aksidente den tráfiko, siendo burachi, ta akusá e hòmber aki tambe di a manehá un outo di kua su seguro ya a kaduká for di 24 di òktober 2025. Ademas su reibeweis ulandes entre tantu tambe a pasa su fecha bálido.

Den sala di korte e akusado a haña asistensia di abogado señora mr. Geraldine Scheperboer Parris, kende a konsentrá bastante riba e sirkunstansia personal di e hòmber, ku na e momentonan ei tabata den proseso di divorsio. El a mustra arepentimentu pa loke el a hasi, kousando un aksidente den tráfiko, pero a relashoná e suseso akí ku su proseso di divorsio andando, pasobra tabata djis despues ku un di e  yunan a yam’é na telefòn i bisa ku mama a sali kas, lagando nan so patras i ku e hòmber a disidí di drenta outo kore bai e kas pa atendé ku e yunan. Na yegada, entre tantu e señora a bolbe na kas, pero a surgi mesora un pleitamentu kampal entre e dos personanan akí den presensia di e yunan. Remarkabel ta e hecho ku e aksidente a tuma lugá 5or di atardi, pero ta despues di 8or di anochi numa el a pasa tèst di rosea. Fiskal señora mr. S.M. Scheer na nòmber di Ministerio Públiko a deklará ku akí ta trata di un delitu bastante serio esta kousa un aksidente bastante grave, kore outo bou di influensia di alkohòl, ku un vehíkulo ku no ta sigurá i finalmente partisipá den tráfiko ku un reibeweis ku su fecha a vense. Pues e demanda kontra di N. ta di un embergadura inmenso ya ku ta trata akí di dañonan finansiero hopi kompleho ku a enserá gastunan médiko, dañonan tantu material komo inmaterial, mester kubri entradanan di su trabou ku e señora a pèrdè, mester atendé ku e kehonan síkiko di e señora a keda kuné, gastunan di e proseso i no papia mes di butnan ku lo keda imponé den korte.

Fiskal a demandá un kastigu di prizon di 7 luna di kua 3 luna kondishonal, mará na un periodo di prueba di 3 aña. Ademas pa 3 aña e lo mester pèrdè su reibeweis di kua 2 aña kondishonal, tambe mará na un periodo di prueba di 3 aña. Ainda ta bini aserka un but di 500 florin kondishonal pa e hecho ku e outo Mini Cooper no tabata sigurá, mas aleu un but di 275 florin tambe kondishonal pa kore outo ku reibeweis kaduká. Tur e demandanan ariba menshoná ta mará na un periodo di prueba di 3 aña.

E abogado ku a hiba palabra na nòmber di e señora ku a bira víktima di e aksidente, a entregá un lista largu di aspektonan ku ta rekerí daño i perwisio, esta tratamentu médiko, gastunan relashoná ku drechamentu di e Kia Rio di e señora, sueldo ku e señora a pèrdè pa motibu ku e no por a traha debí na e aksidente. Wes mr. P.M. Leijten a skucha tur loke a bini padilanti tantu di parti di Ministerio Públiko, komo e abogado di e defensa komo e abogado di e partido perhudiká, komo e propio akusado i a konkluí ku e lo mester di tempu di estudio te dia 15 di aprel binidero pa por dikta sentensia por eskrito.