WILLEMSTAD – Ounke e akusado Schotborg (39 aña di edat) mes no tabata presente den sala di korte, dia di tratamentu di su kaso, wes a disidí ku tratamentu di e kaso ta kontinuá normal. E siudadano akí ta biba na Repúblika Dominikana, pero sa ta ku frekuensia na Kòrsou, segun su abogado señora Mr. Maribel Gomes. Dia 20 di febrüari 2025 Schotborg a hasi su mes kulpabel na violashon di un di e reglanan importante den tráfiko dor di manehá un vehíkulo marka Kia Rio ku e plachi di number S 61-87 bou di influensia di alkohòl.

Segun prueba di e tèst ku a someté na dje, el a skor 1295 microgram, ku ta enormemente haltu i kompletamente iresponsabel pa partisipá na tráfiko riba vianan públiko. Polisnan a mira kon e outo manehá pa Schotborg tabata zeila, koriendo ‘zig zag’ riba kaya i a disidí di par’é mesora pa hasi un kòntròl. Fiskal a hasi e demanda di 13 luna ku e akusado lo mester keda sin reibeweis, kitando e periodo ku a pasa kaba. Tambe e mester paga un but di 2000 florin òf aseptá 40 dia di enkarselashon. Wes Mr. P. M. Leijten a bai di akuerdo ku e demanda di fiskal señora mr. S.M. Scheer, na nòmber di Ministerio Públiko.