Korte: gobièrnu tin tarea di indeksá penshun AOV

WILLEMSTAD.-Korte a emití su veredikto awe den un kaso ku e komunidat aki tabata hopi pendiente di dje. Ta trata e veredikto den e kaso di indeksashon di penshun di AOV. Den su veredikto korte ta indiká ku indeksashon di penshun di AOV no ta un tarea di SVB ni di korte atministrativo. Segun korte, esei ta trata tarea di gobièrnu.

Pues pa e indeksashon di penshun AOV no mester wak den direkshon di korte ni SVB. Artíkulo 7, insiso 2 i 3 di e Ordenansa Nashonal pa Seguro di behes General, Landsverordening Algemene Ouderdomsverzekering, ta stipulá ku indexering ta tuma lugá pa medio di dekreto nashonal. Ku esaki e legisladó a ekspresá ku determinashon di indexering ta un asuntu polítiko ku ta reserva pa gobièrnu.

Den un informe ofisial di korte ta splika tambe ku a tuma e desishon a base di e apelashon ku un penshonado a entrega kontra di un desishon di SVB. SVB a rechasá e petishon di e penshonado pa indeksá su penshun di AOV. Korte a dikta ku SVB a aktua korektamente de e kaso aki.

Korte ta mustra tambe di ta konsiente di e problema ku penshonado a trese dilanti den su kaso. Korte ta rekonosé tambe e obligashon statutario ku ta eksistí pa loke ta trata indeksashon di penshun di penshun di AOV i e konsekuensianan sosial ku ta surgi pa hopi siudadano a konsekuensia di esaki. Sinembargo e desishon aki no ta bisa nada tokante di e pregunta ku si e penshun mester keda indeksá si òf no, sino mas bien si e penshonado a dirigí su mes korektamente na SVB pa esaki. E kontesta ta no. Korte, den su kalidat di korte atministrativo den e prosedura aki, tampoko no por indeksá penshun.