Djabièrnè 27 di mart último, e siudadano di fam Janzen tabata den sala di korte pa responsabilisá pa aktonan sumamente violento ku el a hasi su mes kulpabel na dje riba 3 di ougùstùs 2025. 

E akusashon kontra Janzen ta intento di maltrato pisá, hasiendo uzo di un machete dia 3 di ougùstùs aña pasá. 

Wes mr. T.E van der Spoel klaramente a tuma hopi tempu pa hiba kòmbersashon ku e akusado, kende ya tabata den sala di korte anteriormente pa tratamentu di e mesun kaso akí, pero estilo proforma. Abogado ku a hiba e defensa tabata mr. John Loth, kende a logra ku a skucha testigunan serka wes komisario. Ademas a pidi pa laga Janzen por lo pronto den libertat en espera di e fecha ku e lo mester presentá den sala di korte. Masha remarkabel ta ku e petishonnan akí a keda honrá.  

Ku insistensia Janzen a argumentá den sala di korte ku pa largu tempu nan a busk’é problema. Ta e subrino di su eks a mete su mes den nan asuntunan privá. Pa kolmo ta nèt riba e dia ku Janzen a kaba di kap algun palu di kas na kas di su ruman i tabata regresando kas, ku na dado momento e víktima di fam Lopez a grit’é. E hòmber akí a kuminsá zundr’é pa despues dal’é den su kara di manera ku el a sufri un kòrtá na su kara i esaki a pone ku el a baha for di su vehíkulo, ku su machete den man i dal e víktima dos biaha ku machete.

Wes a referí na rapòrtnan ku tin trahá riba e akusado. A sali na kla ku ta riba e mesun dia ei Janzen tabatin un frikshon ku su eks. Akí wes a bai den detaye, hasiendo tur sorto di pregunta tokante e motibu ku Janzen tabatin e machete huntu kuné. E akusado a splika ku e tabata riba baiskel i tabata su ruman ku a yama i pidi pa bin kap un palu di mata pe.  

Janzen a bai kas kue e machete i a disidí ku e ta bai ku outo. Wes mr.van der Spoel a puntra te hasta ta ki sorto di palu el a kap, pero Janzen a kontestá ku e no sa kon yama e mata, pero ta matanan di bisiña ku e ruman tin molèster di dje. Na su yegada Janzen a mira e eks ta kana bai bin, despues el a mira tambe e víktima D, kende tabata komiendo algu i esaki a kuminsá grita pone tur bisiña sali pafó pa wak kiko ta pasando. Mas aleu e akusado Janzen a sigui splika ku el a keda sintá den outo, siendo e víktima a kuminsá bati riba su outo i ta djei e problema a forma pa bin kulminá den kapmentu ku machete. 

“Pakiko bo no a kore bai for di e sitio?” wes a puntra Janzen. E akusado a respond’é, bisando ku el a sinti ku e mester a defendé su kurpa. Si el a disidí di bai, e lo mester a pasa entre nan i nan tabatin blòki ku otro ophetonan den man, kla pa maltrat’é. Pues, no a ked’é nada otro, pasobra 7 nan tabata huntu na e sitio. E slanan di machete a resultá na man i pia di e víktima. E intenshon, segun Janzen tabata pa plama e hendenan akí for di otro di manera ku e por a kore bai for di e sitio.  Pero, mesora ku e tabata bai, nan a kibra su glas di outo. 

Wes a trese padilanti ku testigunan ku a papia, no a duna e mesun deklarashon. E víktima D por ehèmpel a bisa ku e no a dal e akusado Janzen. E eks kasá di e akusado, sinembargo a bisa ku sí tabatin dalmentu. Tambe a bin padilanti ku e akusado a kap e víktima i ku ainda esaki tin marka na su kurpa i ta sinti hopi doló di e heridanan. Pues klaramente ta un asuntu ku a sali teriblemente for di man. 

Na nòmber di Ministerio Públiko fiskal mr. W. de Graaf a trese padilanti ku a kap e víktima, pero e pregunta krusial ta, ta kon profundo e heridanan ta? Segun Janzen ta raspa e machete a raspa e víktima. Akí fiskal a añadí ku enbèrdat e dos heridanan no ta asina profundo, pero ta dos herida ku a pone ku e víktima D mester a bai dòkter.

Rekapitulando fiskal a konkluí ku ta trata akí di un kaso kaminda e akusado tabatin problema ku su eks kasá, pa bin kulminá den un konflikto kaminda e akusado a kap otro persona ku machete. Segun fiskal lo mester tabatin un interkambio di palabranan hopi fèrfelu pa despues surgi partimentu di sla ku machete. Enfin, a base di tur e deklarashonnan mester konkluí ku tin  diferente vershon. Fiskal a trese padilanti ku tabatin bringamentu i ku ta e víktima ta esun ku a saka man promé, pero e akusado a baha for di outo i a uza un machete pa kòrta e víktima kuné.

Konklushon segun fiskal ta ku e echonan ta legalmente i konvinsentemente probá i ku den e kaso  akí apsolutamente no por papia di defensa propio, pasobra e akusado por a bai for di e sitio. Fiskal mr. de Graaf a sigui insistí ku e akusado por a bandoná e sitio i evitá tur e problemanan ku a sigui despues. Defensa propio ta kompletamente otro, e akusado simplemente por a primi tròt i bai for di e lugá.

Den bista di Ministerio Públiko, e akusado Janzen a dal e víktima ku machete, komo tal ta nesesario hasi un demanda di 150 dia di prizòn di kua 60 dia kondishonal ku tempu di prueba di 3 aña. Ademas Janzen mester bai training di Reclassering. Janzen no mester mantené ningun kontakto ku e víktimanan. E akusado a sinta 90 dia den aresto preventivo kaba, pa tal motibu no ta nesesario pa e regresá prizòn, pero e ta keda ku 60 dia di kastigu kologá riba su kabes.

Wes mr. van der Spoel a reakshoná, bisando ku el a studia e fail debidamente i a skucha bon loke a keda papiá durante tratamentu di e kaso. Tras di e susesonan akí tin hinter un historia entre e akusado i su eks kasá i ku riba e dia 3 di ougùstùs 2025, e konfrontashon a redundá den un eksploshon entre e akusado Janzen i e víktima Lopez. Wes a konkluí ku e víktima a mishi promé, pero mas ku klaro ku e akusado por a kore bai òf baha i papia mas trankil, pero el a sali dirèkt ku machete den man pa regla kuenta i asina ei a kòrta e víktima D na man ku pia. Wes finalmente a bai di akuerdo ku e demanda di fiskal di manera ku e akusado lo mester sigui bou di guia di Reclassering i tambe ta prohibí pa e akusado mantené kontakto ku e víktimanan. Kon tal ta na 150 dia di kastigu di prizòn di kua 60 kondishonal, ku tempu di prueba di 3 aña, wes a kondená Janzen. Di tur manera Janzen a sali bastante bon for di e kaso akí.