WILLEMSTAD – Ku luho i detaye por a mira den sala di korte e grabashon di ladronisia ku a tuma lugá na un kas situá na Kaya Cederela dia 10 di òktober 2025. Tratamentu di e kaso akí tabata djabièrnè 25 di mart último. Esnan kulpabel ta di famnan Trinidad (31 aña di edat), Windster (33 aña di edat), Ross (22 aña di edat) i di orígen Hamaikino, anto finalmente Francisca (37 aña di edat). Francisca no tabata presente den sala di korte i ta netamente esun ku a sali liber. Su abogado enkargá ku e defensa mr. John Loth, den sala di korte kasi no tabatin masha di hasi. E otro abogadonan mr. Zahedi pa e akusado Trinidad,  abogado señora mr. Monique Tromp pa Windster i abogado señora mr. A. Perigault Monte sí mester a tuma tempu pa hiba defensa i aklará e sirkunstansia di nan kliente, esta e akusadonan sintá na e momento ei dilanti di wes. 

Mayoria di e akusadonan akí tin un trayektoria largu ku krímen kometé, pues klaramente nan tin un pasado ku hustisia. Por ehèmpel Trinidad, kende ta esun pa kua fiskal a pidi un kastigu di prizòn mas haltu kompará ku sobrá, tin por lo ménos 8 biaha ku e tabata den korte pa aktonan kastigabel kometé. E punto mas amargo den e totalidat akí ta ku no tin ni sikiera un señal na horizonte ku lo bini un kambio den nan situashon. Tratamentu di kasonan penal manera esnan akí na Kòrsou awendia ta puru rutina. Fiskal ta trese e akusashonnan padilanti, e akusadonan ta papia i komentá kiko nan a hasi òf laga, abogadonan ta hiba e defensa, wes finalmente ta dikta sentensia, e akusadonan ta regresá kas òf ta sinta un par di dia den prizòn, pa djei bolbe presentá pronto atrobe pa otro atrako, kiebro den kas di famia, ladronisia di outo òf kualkier otro krímen kometé.

Manera a bini padilanti, e akusado Ross (di orígen hamaikino) ta esun ku a manehá e vehíkulo den kua su kolaboradónan, akusá di kiebro den e kas na Kaya Cederela, tabata sintá. Manera nan mes a trese padilanti nan a kore sintá den e vehíkulo bai bini, bebe bebida alkohóliko, despues huma mariwana. E grupo akí ke laga parse komo sifuera nan a sali kas sin ningun mal intenshon, no tabatin plan pa hòrta den kas di ningun hende, ni tampoko pa tira atrako. Straño ta ku nan a resultá despues tòg ku hanskun, paña pa tapa kara pa no rekonosé nan. Hanskun natural ta pa hasi ku no ta posibel saka afó ningun fingerprint. 

E akusado Windster na palabra durante tratamentu di e kaso a zona manera tur kos a tuma lugá masha spontáneo mes. Na moda di papia ta e mariwana ku el a bati su kurpa kuné a hasi ku e no tabatin kòntròl riba su komportashon. Tur e akusadonan a preferá pa papia pa nan mes i no konektá nada di loke nan a hasi ku e komportashon i òf influensia di un otro ku tambe a drenta e kas pa hòrta. Maske ta den union tur kos a sosodé i huntu nan tabata den e kas, nan kasi ke laga parse ku nan no konosé otro.  E akusado Trinidad ta esun ku a bini mas na palabra, pasobra wes klaramente tabata bombardi’é ku pregunta. Wes na dado momento a puntra Trinidad si e ta kòrda ainda kuantu biaha e tabata den sala di korte kaba i esaki a murmurá algu di alrededor di 8 biaha. E akusado Trinidad a zona komo sifuera e tin duele di loke a pasa i ku e ta habrí pa aseptá guia profeshonal eventualmente di Reclassering. Den e kas kaminda e grupo akí a drenta, nan a hòrta kahitanan di prenda ku armbant di 18 karat, mas otro prenda, oloshinan di marka Rolex Oyster i di e marka Michael Kors, ku renchinan balioso i sumanan di plaka entre kua 600 florin, 250 dòler merikano, mas 800 florin, hanger pa kadena, armbant koló blou marka Swarovski, tur pertenesiente na señora Perez Castro. Den e dokumentonan di korte klaramente ta menshoná e nòmbernan Trinidad, Windster i Ross komo e aktornan prominente den e akto kriminal akí. Riba e filmashon ta mira klaramente nan yegada na e kas i kon kachónan a kuminsá grita, pero tòg nan a dal bai. Segun e ladronnan akí ta mas òf ménos 3 minüt so nan a keda den e kas. Bisiñanan a yama polis, kendenan a haña algun di e kosnan hòrtá den e outo.

Ampliamente fiskal señora mr. Monique Dennaoui-Simon a para ketu na e sufrimentu teribel di señora Perez Castro kende klaramente ta víktima di un ladronisia horibel den su kas, durante su ousensia, kousá pa e  ladronnan barbá akí ku a drenta e kas via di bentana, ròmel i benta tur kos den otro. Riba vidio por mira yegada di e ladronnan akí, na un kas hopi nèchi atendé, kurá na òrdu mantené, kaminda direpente kachónan ta kuminsá kore i grita. Fiskal a sigui mustra ku ta ku hopi sakrifisio i esfuerso señora Perez Castro a logra establesé su bida ku otronan klaramente ta tormentá di e forma akí. Si ta pa fiskal señora Dennaoui-Simon, 30 luna di kastigu di prizòn inkondishonal Trinidad lo haña, anto 30 luna di prizòn di kua 15 luna kondishonal pa Windster, 30 luna di kua 6 luna kondishonal pa Ross, tur mará na 3 aña di prueba, siendo Francisca lo sali liber di tur akusashon.

Wes mr. van der Spoel sinembargo finalmente a bini ku un kastigu bastante moderá,  esta 18 luna di prizòn di kua 6 luna kondishonal pa Trinidad ku 3 aña di prueba. Pa Ross 240 dia di prizòn di kua 197 dia kondishonal ku un periodo di prueba di 3 aña.  Ademas Ross ta haña kastigu di trabou di 180 ora sino 90 dia será. Pa Windster 360 dia kastigu di prizòn di kua 310 dia kondishonal. Kastigu di trabou di 240 ora sino 120 dia di enkarselashon.