Rei Willem Alexander a manda yama gobernador di St.Maarten

PHILIPSBURG – Ajamu Baly gobernador di St. Maarten mester presentá djasabra
mainta, 9 di aprel, na palasio Huis ten Bosch na Den Haag pa un enkuentro di su mahestat Rei Willem Alexander. Ta Kas Real mes a publiká e anunsio aki awe 31 di mart i ta indiká ku e enkuentro di Baly ku rei ta forma parti di reunionnan ku e monarka
ta hiba ku outoridatnan di Karibe Hulandes.

Pa algun siman kaba tin un situashon di tenshon na St.Maarten. Pa St. Maarten, e
oudiensia di 9 di aprel ta bin na un momento kaminda gobièrnu, kontrol finansiero i reforma atministrativo ta sigui hala atenshon, tantu lokalmente komo den e struktura mas amplio di Reino. Reunionnan manera esaki ta sigurá ku e nivel mas haltu di Reino ta keda informá tokante desaroyonan riba e isla.

A surgi un situashon ku kasi por keda katalogá komo un enfrentamentu entre promé
minister di St.Maarten Luc Mercelina i gobernador di e isla Ajamu Baly. Den un karta
premier Mercelina ta indiká: Transparensia ta kontra “dilnan tras di porta”. Di e forma aki
ta eksponé e gobernador den públiko, miéntras ku ta bon konosí ku e gobernador no
por defendé su mes. Esaki ta hustamente loke Mercelina a hasi dia 25 di mart 2026 ku
e komunikado di prensa: “Promé Minister ta presentá konseho legal tokante e ròl
konstitushonal di e gobernador na Konseho di Minister, Gobernador i Parlamento.”
A manda e mensahe pa medionan di komunikashon sin anekso. Esaki a krea e impreshon ku gobernador Baly a kometé vários fayo i ku el a pone e Promé Minister den un posishon desfaborabel.

Komo hefe di estado, Rei Willem-Alexander ta mantené komunikashon direkto ku
gobernadónan ku ta represent’é den e paisnan Karibe Ulandes. Ajamu Baly ta sirbi komo gobernador di St. Maarten, un ròl ku ta pon’é mes den sentro di relashon entre gobièrnu di isla i gobièrnu di Reino na Ulanda. E gobernador no ta un lider polítiko, sino un outoridat konstitushonal responsabel pa garantisá gobièrnu leal, firmá ordenansanan nashonal, i sigurá ku desishonnan ta kumpli ku Statüt pa Reino Ulandes.