IOC: Transgender no por kompetí den Olimpiada Los Angeles 2028

E Komité Olímpiko Internashonal (IOC) a anunsiá resientemente un desishon ku ta prohibí atletanan transgénero di kompetí den e kategoria di muhé den e Olimpiada di Los Angeles 2028 i despues.

E IOC a publiká un video i un komunikado di prensa ku ta splika e maneho nobo, ku ta limitá e kategoria di muhé “na muhénan biológiko”.

Presidente di IOC i eks-olímpiko, Kirsty Coventry, ta presentá den e video di e komité, deklarando ku e maneho nobo di IOC tabata “basá riba siensia” i ku tin “e mihó interes di atletanan komo prioridat”.

Bou di e maneho nobo, atletanan ku ta kompetí den e kategoria di muhé lo ta someté na un prueba ku tin komo meta detektá e gen SRY (sex-determining region Y protein). E gen ei “ta wòrdu haña riba e kromosoma Y i ta un determinante importante di desaroyo seksual típiko di hòmber”, segun The Athletic.

E IOC a deklará djasabra ku “e presensia di e gen SRY ta fiho pa tur bida i ta representá un evidensia hopi eksakto ku un atleta a eksperensiá desaroyo maskulino”.

Atletanan lo ta someté na prueba via saliva, òf sanger, segun e IOC. Kualke atleta ku ta tèst negativo pa e gen SRY lo ta elegibel pa kompetí den e kategoria di muhé den e Olimpiada. E IOC tin intenshon pa usa e prueba komo un “tèst úniko den bida”, a ménos ku tin “motibu pa kere ku e resultado negativo no ta korekto”.

E IOC tambe a menshoná eksepshonnan na e regla ei. Atletanan ku tin diagnóstiko di Síndrome di Insensibilidat Androgéniko Kompletu (CAIS) “òf otro diferensia raro den desaroyo seksual (DSD), ku no ta haña benefisio di e efektonan anabóliko di mehora prestashon di testosterona” por aún ta permití pa partisipá den e kategoria di muhé.

Atletanan ku ta tèst positivo pa e gen SRY lo ta elegibel pa kompetí “den tur otro klasifikashon pa kua nan ta kualifiká”, segun e IOC. E atletanan ei por partisipá den e kategoria di hòmber, por yena e “espasio maskulino designá” den eventonan miksto i por partisipá den kualke evento unda atletanan no ta klasifiká segun sekso.