Gasolin CG 2.15 pa liter i Diesel CG 2.22 pa liter

WILLEMSTAD – Regulatory Authority Curaçao (RAC) ta informá ku entrante 31 di mart awor lo tin kambio di preis di gasolin i diesel. E preis di gas tantu pa bòter chikí komo e bòter di gas grandi ta keda igual.

Gasolin ku te dia 30 di mart ta kosta 1.94 florin pa liter ta bira 2.15 florin pa liter. Gasoil ku awor aki ta 1.63 florin pa liter ta subi i bira 2.22 florin pa liter. Manera indiká bòter di gas di 20lb ta keda 16 florin i e bòter di gas di 100lbs ta keda 80 florin.

RAC ta splika ku e tarifa pa usuario final pa Mogas 95 i Gasoil (U)LSD ta subi kompará ku e luna anterior, debí na prinsipalmente e resultado di un subida den e preis di kompra. E subida di e preisnan ta direktamente debí na e guera na Medio Oriente. Esaki a desordená gravemente e suministro di kombustibel riba merkado internashonal, espesialmente esun di diesel. E subida di preis di Mogas 95 ta wòrdu suavisá pa motibu ku den luna di aprel lo usa parsialmente kompra di luna di febrüari. Pa diesel esaki no ta e kaso, debí na echo ku esaki ta sigui e desaroyo resien di preisnan internashonal.