360 Florin di but pa Belioso pa motibu di buracheria

Dia 13 di febrüari 2026, durante periodo di karnaval, a konstatá ku e siudadano di fam Belioso tabata burachi bou di viadùkt den Otrobanda. E siudadano akí tin 40 aña di edat, pues ta trata di un persona di sufisiente madures pa sa ku un komportashon asina di su parti no ta aseptabel. Tratamentu di su kaso den sala di korte tabata djaluna 25 di mei último, pero ni e akusado Belioso, ni ningun abogado tabata presente. Fuera di su presensia wes señora mr. H.R. Bracht i fiskal señora mr. Keller a tuma e desishon ku ta imponé un but di 360 florin riba e siudadano akí.

Gogulski gará ku mariwana

E siudadano di fam Gogulski tin 24 ana di edat i ta nase na Ulanda. Dia 15 di febrüari a garé ku mariwana, ku el a bisa ku ta pa uzo personal. Pa kolmo e no tabatin ningun dokumento di identifikashon huntu kuné. Den sala di korte su kaso a keda tratá i finalmente a yega na e konklushon ku ta duné un but di 360 florin.

Butnan haltu (1020 florin) pa Hersilia

Un siudadano di fam Hersilia, kende tin 17 aña di edat i ta nasé na Boneiru dia 15 di febrüari a manehá un bròmer ku e plachi di number MF 54-21 den Breedestraat na altura di Hotèl Harbor. Akí outoridatnan a gar’é, konstatando ku el a faya flagantemente ku reglanan di tráfiko. E akusado S. Hersilia no tabatin un hèlmu huntu kuné, e no por a proba ku e vehíkulo ta sigurá, anto tampoko e no tabatin su reibeweis pa mustra outoridatnan.

Pa akusashon nr. 1 (kore e vehíkulo sin ta sigurá) a dun’é un but di 360 florin. Pa akusashon nr. 2 (sin Hèlmu bistí) un but di 360 florin. Anto pa akusashon nr. 3 (sin reibeweis) a duna Hersilia un but di 300 florin. En total ta forma e suma di 1020 florin na but ku e mester paga, sino kai será.

But di 360 florin pa Leue kende a kore bròmer sin hèlmu

Otro persona ku su kaso a keda tratá den sala di korte dia 25 di mei, fuera di su presensia, ta di fam Leue. E tin 37 aña di edat. Den Roodeweg na altura di pòmp di gasolin, e akusado Leue a manehá un bròmer sin hèlmu bistí. Pa tal motibu wes señora mr. H. R. Bracht a konden’é na un but di 360 florin.

Mutueel su but a baha te na 175 florin pa mal trabou di polis

Tres akusashon tabatin kontra di e siudadano di fam Mutueel, kende tin 19 aña di edat. Tabata pasobra riba dia 15 di febrüari 2026, e no a duna oido na òrdu di polisnan na e sitio, kendenan a someté pa duna kuenta i rason pa su komportashon. Tambe Mutueel a resistí na momento ku a bai warda di polis kuné, anto finalmente e no kier a mustra su dokumento di identifikashon tampoko. Fiskal mr. Keller a repasá e dokumentonan i mesora a konkluí ku e dokumento produsí pa polis ta defisiente, no por a saka afó kiko presis a sosodé. Pesei no a keda nada otro pa duna Mutueel un but di no mas ku 175 florin.