BLUE WAVE, UN OPORTUNIDAT DI ORO

Ku Kòrsou su partisipashon na mundial 2026, atraves di futbalistanan bibá den eksterior, por a mira klaramente ku tin un oportunidat di oro pa presentá nos isla den un spòtlait super interesante i ku un alkanse inmensamente grandi. Natural por rekalmá ku no ta hungadónan nasé akí na Kòrsou, pero ta nos tur mester realisá i komrpondé ku ta nòmber di Kòrsou ta bai zona i ta nos lo ta den e spòtlait mundial. Ta pesei tin e deber ainda pa sigui hasi lo máksimo pa e fama ta realmente na fabor di Kòrsou, komo tal laga pa e resultadonan ta satisfaktorio, no humiante! Pues no ta sufisiente pa ekspresá ‘nos a yega mundial, anto ta basta’, sino mester kuida i laga pa e ekipo ku ta representá nos ku su partisipashonnan den mundial, ta  tremendamente bon. Ta pesei debidamente ta konta ken ta entrenadó nashonal (bondscoach), ki propósito esaki tin, kon e ta manehá, kon ta ku e ambiente den e ekipo, kon haltu e motivashon ta, e nivel i preparashon di tur esnan ku ta bai sali na nòmber di Kòrsou riba tereno. Mester para firmemente tras di e opinion ku ta selektá e hungadónan mihó!

Tabatin Dick Advocaat, despues Fred Rutten, awor ata Dick Advocaat atrobe, ta lógiko ku tur e faktornan akí ta di influensia riba e resultado durante Kòrsou su partisipashon na mundial. Pero, e desishonnan prinsipal ku lo mester tuma ta den man di direktiva di Federashon di Futbòl Kòrsou (FFK). Ta un lástima ku sierto desishonnan a lanta duda, pero ohalá e ekipo ku ta na nòmber di Kòrsou, lo sigui lucha pa duna e resultadonan ku pueblo di Kòrsou i su fanátikonan ta deseá.

No tin duda ku Blue Wave, e ambiente rondó di Kòrsou su partisipashon na futbòl mundial 2026, por tin un impakto hopi positivo riba e sentido kolektivo di nos pais, esta nos pueblo kurasoleño. Ta algu ku mester a tene kuenta kuné for di prinsipio pa duna guia den skol, den barionan, na organisashonnan di futbòl akí na Kòrsou i demas deportistanan.

Gobernantenan no mester sinta warda e fecha yega ku Kòrsou su ekipo mester enfrentá Alemania, Ecuador i Kosta Marfil, pa e ora ei numa duna kara, sino mester sòru ainda pa harma trayektonan ku konsientemente ta sirbi pa enkurashá, apoyá, motivá i suprayá e importansia di nos partisipashon na mundial 2026. No laga pa rondó di un suseso asina importante ta demostrá un aktitut di flakesa mental i spiritual, komo sifuera ‘tantu bal’. Gritunan na bos haltu pa promové positivismo mester kuadra ku un komportashon responsabel, di solidaridat i kombibensia real. Ademas, for di awor mester kuminsá pensa i dal e pasonan riba kon ta kontinuá despues di mundial 2026. Ku e partisipashon pa e promé biaha aki na mundial di futbòl, nos lo mester a siña pa un próksimo biaha.

Laga nos uza e momentonan tan balioso akí pa krea un ambiente di plaser i alegria den hinter Kòrsou. T’esaki ta e momentonan pa demostrá kurashi, determinashon i kalidat di liderasgo.

Erwin Raphaëla