WILLEMSTAD— Pa promé biaha na Kòrsou Ministerio Públiko a sera akuerdonan prosedural den un kaso penal grandi. E desaroyo aki ta marka un paso importante den e modernisashon i efisiensia mas leu di atministrashon di hustisia penal den e pais. E kaso ta trata di sospechonan di embolbimentu den importashon i trafikashon di droga, labamentu di plaka i trafikashon di arma durante un periodo di vários aña. Akuerdonan prosedural ta destiná pa manehá kasonan penal na un manera efisiente, transparente i kuidadoso, ku tur rèspèt pa e derechonan di tur partido den e prosedimentu i e rekisitonan di un huisio hustu. Aunke ta hasi e palabrashonnan aki entre Ministerio Públiko i defensa, Korte no ta mará na esakinan. Hues di un manera independiente ta evaluá si e akuerdonan ta apropiá i hustu. Den e kaso aki a hasi palabrashonnan pa loke ta trata e prosedura i areglo di e kaso penal. A keda palabrá ku e sospechoso:

• ta apstené di entregá petishonnan pa mas investigashon;
• ta retirá petishonnan entregá anteriormente pa investigashon;
• no ta presentá niun otro argumento di defensa basá riba prueba;
• no ta duna mas deklarashon;
• ta distanshá su mes for di ophetonan konfiská;
• ta distanshá su mes for di su bienesnan.

A kambio di esaki, Ministerio Públiko a hasi palabrashon pa loke ta trata e demanda di kastigu. A tene kuenta ku e gravedat di e echonan, e ròl di e sospechoso, i e benefisionan ekonómiko prosedural ku ta surgi for di e akuerdo aki.

E promé aplikashon aki di akuerdonan prosedural na Korsou ta mustra ku e instrumento, manera apliká den otro hurisdikshonnan, por kontribuí na e maneho efisiente di kasonan penal kompleho si komprometé revishon hudisial independiente. Durante di e seshon públiko, Korte a evaluá e akuerdonan prosedural di forma independiente i después di esaki a dikta un sentensia konforme e akuerdonan aki.