Duran Orozco den problema serio ku hustisia pa motibu di droga

Djaluna 8 di yüni último tabatin tratamentu di kasonan penal ku ta karga e nòmber ruta Hato, ta kasonan ku tin di haber ku eksportashon òf importashon di droga. Promé akusado ku a presentá dilanti di wes ta un hòmber kolombiano ku e fam Duran Orozco, kende tin 22 aña di edat. El a keda transportá for di prizòn di Koraal Specht pa sala di korte.

E persona akí ta akusá di a transportá e kantidat di 15.090 gram di kokaina i tabata dia 30 di mart 2026 ku a gar’é. Abogado mr. Ulrich Dickens ta esun enkargá ku e defensa di Duran Orozco.

Tratamentu di e kaso tabata proforma, esei ke men ta únikamente palabrashonnan ta keda hasí den e fase akí òf ta repasá pa mira kon leu ta ku e investigashon andando. Fiskal señora mr. K. Hara a hiba palabra na nòmber di Ministerio Públiko, indikando ku ta trata di e kantidat di 15.090 gram (15 kilo) ku a gara e akusado kuné, anto ku e fail ta práktikamente kla pa tratamentu, ku a hasi investigashon riba su telefòn i ku otro detayenan di e investigashon ta bastante avansá i kasi den e fase final.

Dia 7 di sèptèmber binidero lo trata e kaso riba kontenido. No ta posibel pa laga e akusado Duran Orozco den libertat temporalmente pasobra tin opheshonnan grandi i fuerte debí na akusashonnan pisá ku tin kontra dje.

 Lourens sentensiá fuera di su presensia

Na momento di tratmentu di e kaso di e siudadano S. Lourens, kende tin 35 aña di edat i ta biba na Rotterdam-Ulanda, no tabatin ni e akusado, ni un abogado presente. E akusashon kontra di Lourens ta ku dia 27 di yanüari 2026 a gar’e ku 75 gram di hasj. E supstansia akí tabata hinká den bleki i outoridatnan a mira algu koló pretu i mesora a disidí di bai mas aleu ku e investigashon pa konstatá ku ta trata akí di droga, esta hasj. Den bista di Ministerio Públiko, fiskal señora mr. K. Hara ta trata akí klaramente di un firstoffender, kende a duna full koperashon ora outoridatnan tabata hasi e investigashon. Fiskal a opiná ku normalmente un kastigu di 6 luna di kua 3 luna kondishonal ta stipulá den e tarifa di kastigunan demandá pa Ministerio Públiko pa kasonan asina, pero ta parse ku e persona a kue kurpa, pues ta lag’é na un amonestashon, komo tal e demanda ku fiskal a hasi ta 1 luna di kastigu di prizòn kondishonal, mará na un periodo di prueba di 2 aña. E akusado Lourens ta haña su telefòn i pasaporte bèk. 

Dos luna kastigu di prizòn kondishonal pa Silië

Dia 27 di yanüari 2026 e siudadano M. Silie, kende ta biba na Spijkenisse-Ulanda, a purba drenta Kòrsou ku 210 gram di hasj, mas 10 gram di mariwana. E ta un firstoffender ku a deklará ku e droga ta pa uzo personal. Mirando den su maleta outoridatnan a haña sospecho ku lo tin algu robes eiden, na momento ku a reis riba un plèstik koló pretu ku un supstansia bruin aden, tambe a tuma nota di 1 paki koló bèrdè, pero den esei tabatin e mariwana. Klaramente ta trata akí di un firstoffender segun fiskal señora mr. K. Hara. Un demanda di 2 luna kastigu di prizòn kondishonal, marána un periodo di prueba di 2 luna fiskal a hasi ku kua wes señora mr. E. J. van Rijssen a bai di akuerdo.

  Dominikana di fam Garcia-Fulgencio a yora masha pisá den sala di korte

Segun e dama di fam Garcia-Fulgencio (32 aña di edat) su eks kasá a hink’é den problema grandi dor di manda un amigu trese un pakete ku e mester a pone riba pòst, pero ku despues a resultá ku esaki ta kontené 3216 gram di kokaina. E suseso akí a tuma lugá dia 16 di novèmber 2023, pues ta un kaso bastante bieu, kasi 3 aña i ta lógiko ku wes i fiskal ta tene kuenta ku un periodo asina largu ku e dama akí a pasa den preshon (strès pa motibu ku el a keda asina tantu aña konstantemente pendiente aktuashon di hustisia kontra dje).

A bini padilanti ku e akusado no tabata sa ku tin droga den e pakete i a konfia su kasá sin mas pa bai pone e pakete riba pòst. Manera a trese padilanti durante tratamentu di e kaso djaluna 8 di yüni 2026, a pasa hopi tempu i ta awor numa e akusado mester a presentá den sala di korte, anto pa kolmo e ta mama di yu, siendo awor e tin 5 luna na estado. E akusado Garcia-Fulgencio a duna na outoridatnan nòmber kompletu i direkshon di e kas di su eks kasá aya na Ulanda, pero esaki a ninga kategórikamente di ta esun ku a pone e señora pòst e pakete. Hecho ta ku e fam di Garcia-Fulgencio a aparesé riba e pakete, komo tal ta esun ku a manda e pakete i finalmente ta konsiderá responsabel. E pakete ku e amigu di su eks a trese na kas pa pone riba pòst tabata será.

Tantu wes señora mr. E.J. van Rijssen komo fiskal mr. K. Hara a sigui hasi hopi pregunta na Garcia-Fulgencio, bayendo te den detaye, pero e señora tabata yora konstantemente, bisando ku e hòmber a hasi maluzo di dje. Abogado mr. Ulrich Dickens a trese padilanti ku e sirkunstansia di salú di e señora akusado, kende awor ta na estado, ta prekario, mustrando riba e riesgo di pèrdèmentu di yu òf ku e beibi por nase ku problemanan debí na e situashon di konstante strès, awor ku e shon ta na estado. E señora a keda 3 dia enkarselá, despues ku outoridatnan a konstatá ku tin droga den e pakete. Den e pakete tabatin 3 mesa di palu, plùs 6 paki di puiru blanku. E hòmber kolombiano tin 28 aña di edat i ta biba aktualmente na Hoogezand-Ulanda. Tambe a bini padilanti ku e relashon entre Garcia-Fulgencio ku e hòmber kolombiano a dura 1 aña i un par di luna, segun e akusado. Finalmente fiskal a demandá un kastigu di trabou di 200 ora, sino e akusado mester sinta 100 den prizòn (si e no kumpli). Ademas Garcia-Fulgencio ta haña un kastigu di prizòn di 12 luna kondishonal, mará na un periodo di prueba di 2 aña. All by all e akusado Garcia-Fulgencio no ta regresá prizòn. Wes i fiskal a tene kuenta ku tur aspekto ku a bini padilanti.