6 luna di kastigu di prizòn kondishonal pa Damascus.

Un siudadano di fam Damascus, kende tin 28 aña di edat, dia 5 di aprel 2025 a purba hòrta for di un outo pertinensianan ku ta toka un persona di fam Heijdra. El a kibra glas di e vehíkulo parti padilanti na banda robes, pero e no por a kaba di konkluí e akto akí. Djarason 3 di yüni tabatin tratamentu di su kaso den sala di korte, pero ni e akusado Damascus, anto ni tampoko un abogado pa defendé su kousa no tabata presente. Fiskal na nomber di Ministerio Publiko a demanda un kastigu di prizon di 6 luna kondishonal i wes senora mr. E. J. van Rijssen a bai di akuerdo ku e kondena.

Tratamentu di e kaso di C. Zimmerman atrobe no a kontinuá

Manera ta konosí e siudadano di fam Zimmerman, kende 42 aña di edat ta sospechá di a asesiná D. Gijsbertha dia 2 di òktober 2025. Pa ta eksakto segun dokumentonan di Ministerio Públiko, Zimmerman lo mester a tira ku arma di kandela dirigí riba D. Gijsbertha i G.W.M. Croes, siendo esakinan tabata den un outo. E siudadano D. Gijsbertha a pèrdè su bida komo konsekuensia di e disparonan di bala ku a alkansé. Zimmerman ta sospechá ademas di poseshon di arma di kandela.

For di un prinsipio Zimmerman a ninga kategórikamente di a mata Damascus, pasobra Zimmerman ta insistí ku a bah’é ku outo na e sitio, pero ku en realidat e no tin nada di haber ku e tiroteo. Djarason 3 di yüni último e kaso tabata den sala di korte atrobe pa tratamentu, pero no a kontinuá, pasobra mester skucha testigunan ainda. Remarkabel ta ku for di dia 6 di mart ku  a pasa i ku e kaso tabata den sala di korte pa tratamentu, klaramente a keda demostrá ku e fail ta inkompletu. Segun fiskal señora mr. E. van der Zee, djarason 3 di yüni na momento di tratamentu di e kaso, a bolbe bini padilanti ku e fail ainda ta inkompletu, pasobra mester skucha testigu, warda resultado di rapòrt forensiko ku tin di haber ku e arma di kandela. Abogado mr. John Loth, mirando e situashon ku te ainda su kliente ta pasando den un inmenso insertidumbre, a lansa e petishon pa laga Zimmerman temporalmente den libertat. Pero wes mr. E. J. van Rijssen a mustra ku e sospechonan kontra di Zimmerman ta fuerte i ta preferá warda 4 di sèptèmber binidero ku e kaso lo keda tratá riba kontenido. Mas aleu segun wes tin peliger pa ‘coulitie’, esta e posibilidat ku informashon balioso por keda uzá pa influensiá e kaso.