Parlamentonan Korsou, Aruba i St. Maarten a uni den desakuerdo kontra komportashon di Reino

Den Haag— E delegashonnan di Parlamento di Kòrsou, Aruba i Sint Maarten a yega na un resolushon konhunto, djabpierne na Hulanda. Den e resolushon aki e tres delegashonnan ta ekspresá nan desakuerdo, ku Reino Hulandes a abstené di vota na mart último riba un resolushon di Nashonnan Uní, ku ta rekonosé sklabitut komo un krimen kontra di humanidat. 

E delegashonnan ta lamentá ku Reino Hulandes a tumá su posishon tokante e tópiko aki, sin konsulta previo ku e tres paisnan den Reino. Esaki, apesar di e importansia históriko, sosial i moral direkto ku esaki tin pa nan. Pa e motibu aki, e resolushon ta enfatisá ku e fálta di konsulta aki ta bolbe demostrá un ‘defisit demokrátiko’ struktural den Reino, spesialmente den asuntunan eksterior ku ta afektá e paisnan Karibense direktamente.

Durante e Konsulta Interparlamentario di Reino (IPKO) na Den Haag, e tres delegashonnan, pa medio di nan presidentenan di Parlamento, sr. Alfred Sneek (Aruba), sr. Fergino Brownbill (Kòrsou) i sra. Sarah Wescot-Williams (Sint Maarten), a presentá e resolushon aki na e delegashon di Staten-Generaal di Hulanda (Eerste i Tweede Kamer).