Kaso di empresario di fam Rywani tokante belasting ta wantá te 2 di novèmber 2026

E empresario di fam Rajwani (54 aña di edat i nasé na India) tambe ta den un konfrontashon ku ofisina di belasting pa motibu di no a entregá ‘aangifte’ di winstbelasting riba e periodonan di aña 2018, 2019, 2020, 2021 i 2022. Tampoko e kompania Rajkishore N.V. no a duna informashon na Ofisina di Belasting riba e periodo 27 di yanüari 2025 te òktober 2025. Entre tantu e empresario en kuestion a entregá opheshon na belasting i ta pendiente di e desishon riba su ‘bezwaarschrift’. Wes a splika ku e kaso aki no por keda tratá al momento, komo tal ta warda e fecha 2 di novèmber 2026, pa mira kiko ta e resultado di e ‘bezwaarschrift’

Tratamentu di kaso di belasting di Henriquez den korte tambe mester warda

Otro kaso ku su tratamentu a keda posponé durante e seshon den korte di dia 1 di yüni 2026, ta relashoná ku e empresario Henriquez (61 aña di edat), kende ta enkargá ku e empresa GH Q.C N.V. Akí tambe ta trata di e echo ku no a hasi aangifte di winstbelasting na tempu riba e periodonan 2018, 2019, 2021 i 2022, anto tampoko e empresa no a duna informashon na ofisina di belasting  riba e periodo yanüari 2025 te aprel 2026. Pero entre tantu e empresario Henriquez a entregá opheshon di manera ku mester warda riba e resultado di su ‘bezwaarschrift’.

Kaso di empresario di fam Durga tokante belasting ta wantá te 2 di novèmber 2026

Pa motibu ku doño di e empresa D.S. Construction N.V., señor Durga (59 aña di edat i nasé na Sürnam) a entregá opheshon kontra di ofisina di Belasting, tratamentu di su kaso no a kontinua djaluna 1 yüni 2026 den sala di korte. E kaso akí tin di haber ku e echo ku e empresa ariba menshoná no a entregá aangifte di winstbelasting riba e periodo añanan 2018, 2019, 2020 i 2022 den e término di entrega stipulá pa Inspektor di Belasting. Tampoko D.S. Construction N.V. no a entregá informashonnan relevante pa loke ta e periodo 21 di yanüari 2026 pa 30 di aprel 2026. Tratamentu di e kaso akí riba kontenido no a tuma lugá, mester warda te 2 di novèmber 14.00or pa mira kiko ta resultado di e ‘bezwaarschrift’ entregá. Abogado mr. E. Wilsoe i e ekspertonan presente pa asesorá e empresario ariba menshoná a bai di akuerdo pa laga e tratamentu di e kaso riba kontenido tuma lugá riba e fecha nobo ku wes mr. P.M. Leijten a stipulá.  

Empresario Boskaljon a haña rason serka wes, pasobra e informashon tabata konfuso

Doño di un empresa enkargá ku kuido di djente, ‘Klinika Boskaljon’, esta e empresario di fam Boskaljon (di 64 aña di edat), tabata djaluna 1 di yüni den sala di korte den kompania di su abogado. E empresario a keda akusá di no a entregá ‘aangifte’ durante e periodo 25 di febrüari 2019 te 17 yüni 2025. Klaramente ta referí na ‘aangifte’ pa e añanan 2018, 2019, 2020, 2021 i 2022. Mas aleu ta bisa ku Boskaljon a faya di entregá informashonnan balioso na ofisina di Belasting, loke ta ser konsiderá komo un echo kastigabel.

Den sala di korte a bini padilanti e pregunta si e empresario a haña suspenshon pa entrega di ‘aangifte’ sí òf nò òf si ta trata suspenshon di pago. Klaramente a surgi un situashon hopi konfuso ya ku tabatin kòmbersashonnan telefóniko entre Boskaljon i instansianan enkargá ku belasting. Aparentemente serka Inspektor di belasting señor Boskaljon no tabata haña oido i a kai den un bruashon total, siendo serka Ontvanger sí e por a trese su pensamentunan padilanti. Wes a bai di akuerdo ku e asuntu akí a kue un buèlta sumamente kompliká di manera ku no ta ferwagt ku un persona ku no ta spesialisá den e materia di belasting lo por komprondé. Skuchando tantu e argumentonan di e abogado komo e propio señor Boskaljon, wes mr. P.M. Leijten a konkluí ku mester laga e akusado Boskaljon liber di tur akusashon entregá kontra dje. Ministerio Públiko tin 2 siman pa disidí si ta bai den apelashon.