WILLEMSTAD – Último añanan ta surgi ku frekuensia ku doñonan di empresa akí na Kòrsou ku no hasi ‘aangifte’, ni kumpli ku pago di nan debenan di belasting ta keda yamá den sala di korte pa duna kuenta i rason, anto den algun kaso ta keda kondená, sea ku but òf kastigu di prizòn. Pa atendé tipo di kasonan asina fiskal señor mr. C. Janssen ta biaha for di Ulanda, bini Kòrsou i ta netamente esun ku ta hiba palabra na nòmber di Ministerio Públiko, persiguiendo doñonan di empresa.

Djaluna 1 di yüni 2026 a bolbe  sosodé ku tabatin vários kaso di doñonan di empresa ku mester a aparesé den sala di korte, sea pasobra nan no a hasi ‘aangifte’ di winstbelasting òf inkomstenbelasting i hasta tin doñonan di empresa ku tòg no a kumpli ku areglonan ku a será den pasado ku ofisina di belasting.

Fiskal mr. C. Janssen durante tratamentu di e kasonan a antisipá ku ta yegando e momento ku demandanan mas pisá, esta kastigunan di prizòn na empresarionan ku no kumpli ku nan deber den kaso di belasting, lo bira usual riba e isla akí, pasobra gobièrnu mester di entrada pa kumpli ku su tareanan di asfaltá kamindanan públiko, imbertí den salubridat, enseñansa, paga ònderstant, paga A.O.V. etcetera. Fiskal a añadí ku hasta ta e intenshon pa subi e demandanan ku kastigu di prizòn, pues mester tene kuenta ku empresarionan lo haña nan den e situashon di keda enkarselá.

Promé empresario ku a presentá den sala di korte djaluna 1 di yüni 2026 tabata un siudadano di fam Brute (59 aña di edat), akusá di no a atendé su asuntunan di belasting debidamente. Klaramente e empersario Brute tabata presente komo dirigente di un empresa E.S.E-B.V. pa kua empresa el a faya di entregá aangifte winstbelasting riba e periodo 2018, 2019, 2020, 2021 i 2022. Ni tampoko a duna ofisina di belasting ningun informashon riba e belastingnan ariba menshoná.

Abogado mr. Irving Moenir Alam a duna e empresario ariba menshoná asistensia hurídiko i a para ampliamente ketu pa splika tur e motibunan ku a kondusí ku e empresa no por a kumpli ku su asuntunan di belasting.

Entre tantu tin palabrashonnan konkreto hasí i entrega di aangifte ku a tuma lugá, di parti di Brute, anto pronto lo entregá e último detayenan ku ta trata belastingnan mas resien.

Abogado mr. Moenir Alam a krtitiká e echo ku a sali den publisidat ku e empresario akí lo a kai será pa motibu di belasting. Segun abogado Moenir Alam tipo di rumornan asina ta hasi hopi daño na e imágen di e empresa ya ku ta pone otronan ku ta hasiendo negoshi ku e empresa den un situashon di duda i òf deskonfiansa ku tur konsekuensia teribel ku esaki lo por tin pa e empresa. Komo tal mester koregí e informashon robes ku a plama rondó di e empresa, abogado Moenir Alam a eksiguí. E empresario a entregá aangifte i entre tantu tin tur su asuntunan di belasting debidamente bou di kòntròl. Un ruman di dje ku tabata enkargá ku e asuntunan di belasting di e empresa a fayesé. E empresa tabata den un situashon di lucha pa sobrebibensia.

Fiskal mr. Janssen sinembargo a trese padilanti ku e empresa tin un debe di 500.000 florin na belasting pa kua na dos okashon el a pidi pa posponé e pago, pero finalmente tòg e empresa no a kumpli. Fiskal a trese padilanti un demanda di un kastigu di trabou di 150 ora, mará na un kastigu di prizòn di 3 luna kondishonal ta na su lugá. Tambe a bini padilanti ku un ‘bezwaarschrift’ entregá di parti di e empresa a keda rechasá pasobra esaki no tabata na tempu. Finalmente wes mr. P.M. Leijten a yega na un desishon muchu mas moderá kompará ku e demanda di fiskal ya ku e aangiftenan ta entregá i pronto lo kaba di kumpli ku entregá di e datonan ku falta ainda. Wes ta duna un término di 2 luna pa kumpli, mará na un periodo di prueba di 3 aña, sino mester tene kuenta ku lo tin kastigu di prizòn. Brute, segun e wes a deklará, mester sòru pa atendé su asuntunan di belasting debidamente, esta entrega di aangifte na tempu tantu den kaso di winstbelasting komo inkomstenbelasting. Tambe e empresario mester pèrkurá di kumpli ku kombenionan ku sera ku Ofisina di Belasting.