WILLEMSTAD – Tratamentu di e kaso di e siudadano Giterson (43 aña) den sala di korte djarason 8 di aprel 2026, tabata debí na un pleitu, ku a finalisá ku maltrato i rankamentu di telefòn mobil for di man di señora. Tabata dia 6 di mei 2024 ku entre e siudadano di fam Giterson i su pareha a surgi un konflikto hopi fèrfelu ku a desemboká den maltrato na kara i kitamentu di 1 telefòn Iphone 14 for di e señora. Serka Giterson a surgi deskonfiansa versus di su señora komo ku Giterson a haña e impreshon ku su señora ta gañ’é ku otro hòmber. Pa e echo ku Giterson a agredí e señora den kara el a haña e akusashon kontra dje di maltrato i ladronisia di telefòn.

Polis a presentá na e sitio, kaminda e echo kastigabel a sosodé i a detené e akusado Giterson, kende a pasa 9 dia den aresto preventivo. Giterson tabatin ademas un kaso bieu den pasado riba su nòmber, kaminda tambe el a keda sentensiá ku kastigu di prizòn. Durante tratamentu di e kaso den korte ku resientemente a tuma lugá, e akusado Giterson mes no tabata presente, sí su abogado señora mr. A.M. Tromp.

Fiskal señora mr. K. Hara na nòmber di Ministerio Públiko a hiba palabra i a splika ku entre tantu 2 aña ta tras di lomba i ku despues di loke a sosodé dia 6 di mei 2024, e akusado Giterson a komportá korektamente i no a bolbe kai den otro akto kastigabel. Giterson ta gana su pan di kada dia ku trabounan ehersé den kontrukshon i ta sometiendo su mes bou di guia di Reclassering i tambe sikólogo. Tur kos ta kanando na satisfakshon te ainda, pues no tin ningun motibu pa persiguí Giterson ainda mas. E nuebe dianan ku e akusado akí a pasa den aresto preventivo mes ta sufisiente, segun fiskal señora mr. K. Hara a konkluí. Di e otro kaso ku tabatin kontra di e akusado akí den pasado, tambe fiskal a opiná ku no tin motibu pa hisa esei for di suela, pasobra Giterson a demostrá klaramente ku e ta riba e bon kaminda. Abogado mr. Dickens, kende tambe tabata presente, pero pa e kaso bieu, tabata full di akuerdo ku fiskal pa laga e kaso bieu para un banda.

Abogado señora mr. A.M. Tromp a añadí ku su kliente a duna full koperashon na hustisia, a entregá e telefòn bèk i a mustra arepentimentu pa su komportashon emoshonal dia 6 di mei 2024. E akusado aktualmente ta kompletamente dirigí riba kuido di su dos yunan i dedikashon na su trabou den konstrukshon pa logra su pan di kada dia. Skuchando e argumentonan tantu di fiskal komo e abogado, wes mr. J. van der Groen a bai di akuerdo pa klousurá e kaso te asina leu di manera ku Giterson no tin motibu pa regresá prizòn pa sinta mas kastigu.