WILLEMSTAD – E siudadanonan di fam Mingeli (23) i Christiaan (20), ámbos enkarselá aktualmente den prizòn na Koraal Specht, tabata den sala di korte djarason 8 di aprel 2026 pa responsabilisá nan mes pa akusashon di transporte di 230430 gram di kokaina. No tin duda ku aki ta trata di un lote sumamente grandi. Ademas outoridatnan a haña 1 arma di kandela i e munishon korespondiente na kas di Christiaan, despues di a tene un redada na esaki su kas. Tabata dia 18 di sèptèmber 2025 ku wardakosta a tuma nota di presensia di un boto ku tabata nabegá den un área di laman konsiderá komo zona di trafikashon di droga. E boto señalá riba radar ta pertenesé na e siudadano di fam Mingueli, kende a deklará ku huntu ku su amigu Christiaan nan a subi laman na altura di Caracasbaai, rumbo pa Klein Kòrsou, pa bai piská.

Remarkabel ta e echo ku no tabatin ni sikiera eis riba e boto akí, ni tampoko piská, siendo outoridatnan despues a deskubrí 200 pakete ku a kontené kokaina, ku e peso total di 230430 gram. E boto aki, segun Mingeli, tabata pertenesé na su tata defuntu, pero e mesun boto aki a para 9 aña den kurá di kas di su wela. Mas aleu Mingeli a splika ku el a drecha e boto, anto ku  plaka ku el a spar el a kumpra motor, fèrf e boto, drech’é pon’é den kondishon pa por subi laman pa por piska.

Segun dokumentonan di wardakosta entre 14 pa 18 di sèptèmber 2025 direpente e telefònnan di Mingeli no tabata konektá mas ku Kòrsou, pero klaramente sí por a detektá ku Mingeli tabatin konekshon ku un persona bibá na Venezuela ku el a pidi pa bini ku sigaria pe. Fiskal a sigui suprayá ku durante e periodo di 14 pa 18 di sèptèmber 2025 na Kòrsou a pèrdè tur kontakto telefóniko ku Mingeli i ku ta te dia 18 di sèptèmber numa e kontakto telefóniko a surgi atrobe. Manera a keda tresé padilanti durante tratamentu di e kaso den korte, ta netamente kaminda ta e espasio pa sinta den e boto a hasi algun adaptashon di manera ku por a krea kaminda pa skonde e droga. Ampliamente fiskal a para ketu na e rapòrt di wardakosta relashoná ku tur loke a deskubrí na kurpa di e boto. Mingeli a deklará ku nan tabata piska den serkania di un barku krusero, pero wardakosta ningun momento so no a tuma nota di presensia di ningun ‘cruise ship’, ni ningun otro barku.

Despues ku a interseptá e boto di Mingeli ku e dos personanan aki na bordo, a hib’é Parera pa mas investigashon. Pero, a bin reis riba e droga, despues ku a laga kachó subi riba e boto. E droga ku outoridatnan a deskubrí, a laga tèst na laboratorio ADC.

Mingeli den sala di korte a laga parse komo sifuera e no tabata sa apsolutamente nada di droga i ku e droga lo tabata tur tempu den e boto sin e tabata sa di nada, a lo ménos for di 9 aña pasá den e boto, tempu ku su tata (e doño original di e boto) tabata na bida ainda. Tata di Mingeli a fayesé na aña 2016. Fiskal a ekspresá asombro ku algu asina ei por a sosodé ku e droga den e boto, sin doño di e droga no a rel ni trel durante un periodo asina largu. Anto figurábu 230 kilo di kokaina!!!

Na bordo di e boto tabatin ademas jugnan pa kombustibel yená ku gasoil i esei ta sosodé mayoria biaha ora ku mester nabegá pa distansianan largu. Pues, no tin ningun kuestion di kasualidat, sino ta deliberadamente a planiá tur kos.

Mingeli tin pasado ku hustisia, el a kaba di sali será na yüni 2025. E akusado Christiaan ta un firstoffender, un siudadano fásil pa influensiá, ya ku e ta mentalmente hopi suak, segun sikólogo. Ademas Christiaan ta un siudadano ku ta sufri di ADHD. Polis aña pasá a tira i heridá Christiaan. Abogado mr. S. Zahedi a hiba e defensa pa e 2 akusadonan, tratando di tur manera pa suavisá e akusashonnan ku a subi mesa kontra di e duo.

200 pakete en total di kokaina ku un peso di 230 kilo ta loke wardakosta a interseptá riba e boto. Fiskal finalmente a demandá un kastigu di prizòn di 5 aña pa Mingeli, kitando e periodo ku el a pasa den aresto preventivo. Tambe e demanda di fiskal a inkluí konfiskashon di e boto. Pa Christiaan fiskal a demandá un kastigu di prizon di 48 luna di kua 6 luna kondishonal, mará na un periodo di prueba di 3 aña. Dia 29 di aprel binidero wes mr. van der Groen lo dikta sentensia. Esaki lo ta pa 13.30or.