WILLEMSTAD – Dor ku a traha prosèsverbal masha malu mes, di manera ku e dokumento tan importante aki tabata inkompletu, e parlamentario Benito Desroches a keda perhudiká den un aksidente di tráfiko, kaminda el a keda heridá na pia robes i hasta a pèrdè algun dede di pia ku mester a keda amputá. Si Desroches ainda ke haña parti di e demanda ku el a hasi kubrí, e por purba ku tratamentu di su kaso serka korte sivil. Pero, te asina leu mester konkluí ku e prosèsverbal tabata di asina un kalidat inferior ku esaki no a sirbi pa supstansiá e akusashonnan kontra di e akusado Gomez Sarmiento.

E hòmber di fam Gomez Sarmiento ta di orígen kolombiano, e tin 26 aña di edat. Dia 1 di mei 2023 Gomez Sarmiento a manehá un outo Toyota Vitz ku e plachi di number J. 22-49 i a bai dal un otro vehíkulo i despues un peaton, kende a resultá di ta parlamentario Benito Desroches. Segun Benito Desroches el a pone su outo kantu di kaminda pa krusa kaya, bai kumpra algun merkansia den un minimarket den serkania. E suseso akí a tuma lugá riba Franklin Delano Rooseveltweg, no muchu leu for di Kampo Alegre.

Pero, e prosèsverbal ku a subi mesa durante tratamentu di e kaso, riba djarason 29 di aprel 2026, tabata inmensamente suak, klaramente inkompletu na kontenido di manera ku wes a husga ku mester laga e akusado kompletamente liber di tur akusashon. Entre otro e akusashon ku akusado tin kulpa den e aksidente akí riba Rooseveltweg, koriendo outo di forma no kouteloso i no atento etcetera no a resulta válido.

Tin pará den e prosèsverbal ku e akusado a kita pa un otro vehíkulo i asina ei a bai mas na man drechi i kousa e aksidente. Pero, tin pará tambe ku e no a mira ningun peaton riba kaminda, anto no a deskribí tampoko kon el a dal den e outo pará kantu di kaminda i e aksidente kaminda Desroches a bira víktima. Aparentemente e shofùr Gomez Sarmiento lo a sigui kore bai for di e sitio, despues di e aksidente i ta despues numa el a bolbe bèk na e sitio. Klaramente a bini padilanti ku e vershonnan ku el a duna no ta kuadra ku otro i ku kada unu tabata hasí riba fechanan diferente.

Fiskal señora mr. S.M. Scheer a proponé un kastigu di trabou di 60 ora pa e akusado, mas un but di 500 florin i pago di e daño okashoná na e otro vehíkulo na rason di 3800 florin, pero wes a bari tur e puntonan akí fo’i mesa debí na e echo di un prosèsverbal sumamente mankaron hinká den otro ku a hasi uzo di dje durante tratamentu di e kaso. Abogado señora mr. Maribel Gomes a splika ousensia di su kliente, kende no tabata presente den sala di korte, e ta na Colombia aktualmente, kaminda e ta studiando pa bira abogado, komo tal Gomez Sarmiento tabata komprometé ku kompromiso di estudio. Pa parlamentario Benito Desroches no a keda nada otro sino di purba su suerte dilanti un wes sivil.