WILLEMSTAD – No ta tur biaha ulandesnan europeo ku ta bou di influensia di alkohòl ta komportá korekto na momento ku polis pará nan pa hasi kòntròl. Esaki klaramente tabata e kaso ku e siudadano v/d Velden di 50 aña di edat i kende ta nasé na Ulanda.

Dia 11 di sèptèmber 2023 e persona akí tabata manehá un Nissan Frontier ku e plachi di number X86-48 riba Caracasbaaiweg. Na rotònde di Janwe, polisnan a par’é pa kòntròl. Polisnan a tuma nota ku v/d Velden su wowonan tabata demasiado kòrá i for di su boka tabata sali un holó fuerte di alkohòl. Natural esaki tabata motibu pa polisnan pidié pa hasi e tèst di rosea na e sitio, pero shofùr aki mesora a kuminsá hasi fèrfelu i a ninga kategórikamente pa supla.

Polisnan a buie hòmber, transport’é pa warda di polis, kaminda e hòmber akí a hiba un kòmbersashon (diskushon) ku outoridatnan presente. El a deklará ku e no ta konfia e aparato ku polisnan a konfront’é kuné.

Fiskal señora mr. S.M. Scheer a mustra e akusado ku su komportashon ta unu inaseptabel i ku e mester obedesé polis i mantené su mes na reglanan vigente. E homber a deklará ku e tin masha bèrgwensa pa e forma ku el a komportá e dia ei, p’esei abiertamente e ta pidi despensa. Fiskal a demandá un kastigu di 60 ora di trabou totalmente kondishonal, mará na un periodo di prueba. Un punto di bentaha pa v/d Velden ta ku e no tin un pasado ku hustisia, ademas su komportashon den sala di korte e biaha aki ta demostrá un alto grado di modales i desensia. E kaso aki tin entre tantu kasi 3 aña ku el a tuma lugá.  Wes mr. Sigmar Carmelia a bai di akuerdo ku e demanda di fiskal i a kondená e hòmber konforme e petishon di Ministerio Públiko.