WILLEMSTAD – Djarason, 29 di aprel Korte a dikta sentensia den e kaso di e siudadanonan di fam Mingeli (23) i Christiaan (20), ámbos ta enkarselá aktualmente den prizòn aya na Koraal Specht i ta akusá di transportashon di 230430 gram di kokaina. Ta trata aki di un lote bastante grandi. Ademas outoridatnan a haña 1 arma di kandela i e munishon korespondiente na kas di Christiaan, despues di a tene un redada na esaki su kas. Tabata dia 18 di sèptèmber 2025 ku wardakosta a tuma nota di presensia di un boto ku tabata nabegá den un área di laman konsiderá komo zona di trafikashon di droga.

E boto señalá riba radar ta pertenesé na e siudadano di fam Mingueli, kende a deklará ku huntu ku su amigu Christiaan nan a subi laman na altura di Caracasbaai, rumbo pa Klein Kòrsou, pa bai piska. Pero  riba e boto ni sikiera tabatin eis, ni tampoko piská, sinembargo outoridatnan despues a deskubrí 200 pakete ku a kontené kokaina, anto ku e peso total di 230430 gram (230 kilogram). E boto aki, segun Mingeli, tabata pertenesé na su tata defuntu, pero e mesun boto aki a para 9 aña den kurá di kas di su wela. Mas aleu Mingeli a splika durante tratamentu di e kaso ku el a drecha e boto, anto esei tabata ku plaka ku el a spar i ku a kumpra motor, fèrf e boto, drech’é pon’é den kondishon pa por subi laman pa por piska.

Fiskal finalmente a demandá un kastigu di prizòn di 5 aña pa Mingeli, kitando e periodo ku el a pasa den aresto preventivo. Tambe e demanda di fiskal a inkluí konfiskashon di e boto. Pa Christiaan fiskal a demandá un kastigu di prizòn di 48 luna di kua 6 luna kondishonal, mará na un periodo di prueba di 3 aña. Pero korte djarason 29 di aprel ku e veredikto a yega na kastigunan muchu mas leve, pasobra pa ámbos siudadano wes a dikta 48 luna kastigu di prizòn di kua 12 luna kondishonal, mará na un periodo di prueba di 3 aña. E kokaina lo keda saká for di sirkulashon. Tambe a konsiderá nesesario pa duna ámbos siudadano guia profeshonal dor di Reclassering.