WILLEMSTAD – Regulatory Authority of Curaçao (RAC) ta informá ku entrante djamars próksimo 5 di mei 2026 e tarifa di gasolin i diesel ta subi na Kòrsou. Tambe e tarifa di awa ta subi entrante djabièrnè 1 di mei 2026. E tarifa di elektrisidat ta keda práktikamente meskos. Gasolin ta subi ku kasi 34 sen pa liter i diesel ta subi ku kasi 35 sen.

E kálkulo di tarifa pa Mogas 95, Gasoil LSD, LPG 20 i LPG 100 konosé e komponentenan 1. Preis di kompra, 2. Impuesto di importashon LSD, 3. Garantia di suministro di kombustibel (1a), 4. Garantia di suministro di kombustibel (1b), 5. Márgen pa Curoil, 6. Impuesto di konsumo (Akseins), 7. Surplus/Défisit (Recovery), 8. Supsidio krusá, 9. O.B. di 6% pa benta por mayor, 10. Márgen pa agente, i 11. O.B. di 6% pa benta por detal. Pa sierto komponente e tarifa sero ta konta, sea temporalmente òf nò. E tarifa pa benta por mayor ta inkluí e promé nuebe komponentenan miéntras ku e tarifa pa benta por detal (na usuario final) ta inkluí tur komponente. Ta determiná e preis di kompra, kaminda kalkulashon ta kuminsá, mensualmente pa e luna siguiente a base di e reserva di kombustibel disponibel na final di luna pasá. Pues: e preisnan di kompra ku ta stipulá pa mei 2026, en prinsipio ta basá riba e reserva di kombustibel disponibel pa final di mart 2026.

Den kaso ku si e informashon tokante di reserva duná dor di Curoil ta inalkansabel, lo tin ku sali for di e kotisashon internashonal resien. E preisnan di kompra aki ta wòrdu revisá dor di notashon di preis internashonal. Dor di e lapso aki den e mekanismo pa determiná preis, por ta nesesario pa deskontá eventual diferensia entre e preis di kompra regulá i e montantenan di kompra real, di forma retroaktivo via e elemento ‘Surplus/Défisit’. E tarifa usuario final pa Mogas 95 i Gasoil (U)LSD ta subi kompará ku e luna anterior, debí na prinsipalmente e resultado di un subida den e preis di kompra. E guera na Medio Oriente te ainda ta e motibu prinsipal pa e subida di e preisnan. Esaki a desordená gravemente e suministro di kombustibel riba merkado internashonal, espesialmente esun di Gasoil (U)LSD.