WILLEMSTAD – Manera indiká den un artíkulo anterior, servisio di impuesto (Ontvanger) a pone beslag riba kuenta di salario di un trahadó, pues no di un kompania. Un siudadano ku su salario di luna ta bai riba un kuenta na banko i for di esei e mester kumpli ku pago di hür òf hipotek, fiansa di outo, awa, koriente, Internèt i kuminda pa kas. Ku énfasis ta hasi e diferensia ora ta trata di un trahadó òf si ta un empresa. Dikon, pasobra un empresa tin fondonan ku por paga un fiskalista i abogado pa kana e proseso legal kostoso ku ta nesesario pa koregí e situashon.

E materia ta kompliká, pero ta mas lamentabel ora ku esnan ku sa mihó tòg ta hasi nan esfuerso máksimo pa konfundí e komunidat na logá di duna e splikashon korekto i honesto, i kaminda ta nesesario aseptá ku ta kometé abusu di poder.

Ta un echo ku Ontvanger tin su manera pa yega na e desishon pa pone beslag riba “salarisrekening” di un trahadó na banko, anto ku esaki ta sosodé sin tene kuenta ku “zorgvuldigheid” den e proseso di kobransa i ponementu di beslag riba kuenta di salario di un trahadó. Ontvanger ta manda un promé karta, despues dos ‘aanmaning, despues ta sigui ‘dwangschrift i finalmente ta pone beslag. Pues kuater paso!

Ontvanger a manda karta i ‘aanmaning’ den e Kòrsou di 2026 Ontvanger a konfirmá ku e kartanan ei a bai na e adrès korekto? A chek si e trahadó a entrega ‘bezwaar’? Hopi importante; Inspektor a atendé e ‘bezwaar’? Lei ta preskribí ku si e trahadó a entrega ‘bezwaar’ anto nuebe luna a pasa i e no a tende nada di Inspektor di impuesto, e mes tin ku tuma e pasonan pa bai korte den ‘beroep’. Hendenan a puntra kuantu ta kosta pa un fiskalista i un abogado, pues kon kostoso e ta bai e trahadó ei bai korte den ‘beroep’? Un bia mas, no pèrdè for di bista ku ta trata di un kaso di un trahadó komun i koriente ku un salario, i no un empresa!

Siguiendo ku e análisis di e situashon, si e periodo a pasa e trahadó ei no tin niun manera pa koregí e ‘aanslag’ inkorekto. Lo no ta mas mihó i hustu si gobièrnu pèrkurá pa Inspektor atendé tur ‘bezwaar’ di manera ku e trahadó simpel no mester di e proseso di bai den ‘beroep’? Bèrdat, lei ta bisa ku si tin un ‘beslag’ anto e ta inkorekto e siudadano, e trahadó por bai den ‘verzet’. E gastu pa un hende komun i koriente bai den ‘verzet’ ta enorme, pues esun ku presentá e opshon ei komo solushon pa un simpel siudadano simplemente no ke biba ku realidat. Pa ba de ‘verzet’ mester paga gastunan di deurwaarder, di griffie i abogado pa hasi e kaso.

Lo ta bon pa urgi gobièrnu pa krea fasilidat pa atendé ‘bezwaarnan’ na tempu i asina ta hinka siudadanonan den perkansia i hopi preokupashon. Mester garantisá ku promé ku pone ‘beslag’ riba kuenta di salario di trahadó, ku ta verifiká si aanslag, aanmaning  dwangschrift a bai na adrès korekto. Siendo un trahadó, pues e instansianan por mira kua ta e dunadó di trabou i por pone beslag riba e salario serka e dunadó di trabou. Esei ta nifiká ku ta máksimo 1/3 parti di e salario ta pone ‘beslag’ riba dje i e sobra e trahadó por kumpli sikiera ku obligashonnan primario manera hür of hipotek, fiansanan, kuminda etc. E yu di Kòrsou mester por spera un servisio di impuesto hustu!