WILLEMSTAD – Impuesto ta algu ku tur hende mester paga. No tin ningun diskushon tokante di esei. Pero kobransa di impuesto no por bira un medio siegu i desproporshonal kaminda trahadónan direpente no tin akseso mas na nan salario i, konsekuentemente, no por paga nan hür, hipotek, awa, lus, kuminda, gastunan di skol, remedi òf transporte pa bai trabou.

Un kuenta di salario no ta un kuenta di banko komun i koriente. Pa un trahadó i su famia, esaki ta e base di bida diario.

E liñanan di guia pa kobransa di impuesto a keda establesé hustamente pa garantisá transparensia, uniformidat, siguridat hurídiko i kuido den e proseso di kobransa. P’esei, Ontvanger no mester wak solamente si tin un debe di impuesto habri, pero  mester wak tambe e kapasidat finansiero di e siudadano, e konsekuensianan personal i si tin un medida ménos drástiko posibel.

Esaki ta bal mas ainda ora ku ya a pone un bezwaar kontra di e aanslag i e Inspektor ainda no a tuma un desishon. Den un situashon asina, e debe di impuesto ainda ta den diskushon. Ta difísil pa hustifiká ku Ontvanger tòg ta tuma medidanan drástiko ku ta paralisá finansieramente e trahadó, miéntras ku e legalidat òf montante di e aanslag ainda no ta fiha.

Pa un trahadó partikular, un prosedura di bezwaar ta ademas kostoso. Asistensia legal, dokumentonan atministrativo, derecho di tribunal, dianan liber i e tempu nesesario pa defendé su mes ya ta pone un preshon grandi riba e siudadano. Si banda di esei tambe pone beslag riba su kuenta di salario, esei ta pone ku ta difisil pa e por logra buska asistensia legal. E trahadó ta enfrentá no solamente un aanslag, sino ku ta hasi finansiermante imposibel pa e defendé su mes.

Lo ta bon si minister konsidera pa duna un instrukshon den kua ta stipula ku ponementu di beslag riba kuenta di salario di un trahado por tuma luga solamente den kasonan hopi ekstremo.

Ademas, mester ta asina ku ora ku a pone  un bezwaar na tempu, kobransa di e parti ku ta den disputa, en prinsipio, ta keda suspendé te ora e Inspektor òf hues a tuma un desishon, salvo si tin sirkunstansianan speshal manera peliger probá di froude òf abuso. Asina ta evitá ku siudadanonan keda obligá sin nesesidat pa proseduranan kostoso òf agotá finansieramente promé ku evaluá nan kaso.

E minister por garantisá esaki den práktika dor di:

obligá e Ontvanger pa promé ofresé un areglo di pago basá riba kapasidat finansiero pa trahadónan;

limitá beslag riba kuenta di salario na kaso eksepshonal;

protehá eksplísitamente e mínimo di eksistensia di e trahadó i su famia;

suspendé kobransa di e parti den disputa miéntras oposishon òf apelashon ta kore;

introdusí un prosedura rápido i fásil ku Ontvanger na momentu ku trahadó nota ku nan kuenta di salario ta blòkia;

hasi un reevaluashon inmediato di beslagnan eksistente riba kuenta di salario.

Ken ku debe impuesto mester paga. Pero un gobièrnu ku ta tuma siguridat hurídiko na serio no por usa su poder di kobransa di tal manera ku trahadónan no tin mas sèn pa biba òf pa defendé nan mes legalmente.