Fiskal:14 aña kastigu pa hòmbernan (17 i 26 aña) ku a kometé asesinato

Den kaso asesinato kruel di Sharlstone Melfor Benito

WILLEMSTAD— Djarason 6 di mei 2026, tribuna públiko di sala di korte tabata totalmente yená ku siudadanonan interesá pa presensiá tratamentu di e kaso di e hóben di 19 aña di edat, Sharlstone Melfor Benito, kende dia 5 di yüni 2025 a keda likidá kruelmente den e bario Seru Fortuna. E kurpa sin bida di e hóben ariba menshoná a keda hañá pa polisnan den un outo dilanti di un kas den Kaya Yobida.

Segun fiskal mr. R. Steen, na nòmber di Ministerio Públiko, esnan konsiderá responsabel pa e asesinato kometé ku balanan salí for di armanan di kandela, ta M. Koster, alias ‘Pollo’ (26 aña di edat) i S. Jozef (17 aña di edat). Dia ku e asesinato a tuma lugá ta e edatnan ei e akusadonan tabatin, pero entre tantu nos ta kasi un aña mas leu. Na kurpa di e vehíkulo den kua a haña e víktima, klaramente tabatin algun perforashon di bala, siendo e víktima mes tabata bentá morto riba e asiento ku ta banda di shofùr.

Sumamente remarkabel den e kaso aki ta ku ningun momento so no a bini padilanti pa ki rason a tira Sharlstone Melfor Benito mata, sino únikamente ku tabatin menasanan ekspresá anteriormente den direkshon di e víktima, tur esaki di akuerdo ku deklarashonnan di testigu. E akusadonan, konsiderá responsabel pa e morto, esta Koster i Jozef, a komportá komo sifuera masha inosente mes, nan no sa di nada i no tin apsolutamente nada di haber ku morto di Sharlstone. Koster a ninga kategórikamente ku e tin e nòmber di kariño ‘Pollo’, nunka e no a tende nan yam’é ‘Pollo’ tampoko. Suniel Jozef durante tratamentu di e kaso klaramente tabatin un komportashon a la estilo sanger friu, masha poko na palabra i sumamente ‘cool’.

Pero apart di e asesinato di Benito kometé dia 5 di yüni 2025, tin mas akusashon di tiramentu ku arma di kandela riba e akusadonan akí su nòmber. Pa kuminsá Koster ta akusá di a tira dia 20 di mei 2025 ku arma di kandela riba e siudadanonan A. Martha, U. Martha, C. Constansia i B. Fidanque, ounke ningun di e siudadanonan menshoná no a keda leshoná. Outoridatnan a haña un arma di kandela den poder di Koster, e lo mester tabatin durante e periodo 20 di mei 2025 pa 18 di sèptèmber 2025 un òf mas arma di kandela entre kua 1 pistol LLAMA, modelo Max-1, kaliber 45 ACP ku 8 patronchi, huntu kuné.

E otro akusado Jozef, fuera di e kaso kontra di Benito, tin riba su nòmber tambe tiramentu ku arma di kandela riba H. Windster i R. Hooi dia 4 yüni 2025, kendenan tabata den un vehíkulo (1 dia promé ku e asesinato di Benito). Ademas di a tira dirigí riba e outo ku Windster i Hooi sintá aden, Suniel Jozef lo a lòs algun bala den laira. Den sala di korte a pasa imágennan di vidio ku ta mustra un ke otro.

Djis na kuminsamentu di tratamentu di e kaso abogado di e akusado Koster, alias ‘Pollo’, señora mr. A.M. Tromp a presentá algun informashon ku el a pidi pa añadí na e fail. Ta trata aki di grabashonnan di vidio di e tiroteo kontra di Benito, mas un voice-mail di menasa kontra su kliente Koster. Fiskal señor mr. Steen a reakshoná ku asombro riba e echo ku e abogado a warda asina tantu pa den pitu numa kore entregá e detayenan akí. Tòg segun fiskal di parti di Ministerio Públiko a hasi tur posibel pa ainda interogá esnan konserní. Fiskal a trese mas aleu padilanti ku e ta hopi konsiente for di kua huki e informashonnan akí a bini, esta for di doño di e kámaranan ku no a koperá ku e investigashon di outoridatnan hudisial. Enfin, durante tratamentu di e kaso no a sigui ku mas atenshon dediká pa e detayenan akí, entregá den pitu, djis e anochi promé ku tratamentu di e kaso den sala di korte.

Fiskal mr. Steen a rekonosé ku e fail ku ta trata asesinato di Benito no ta 100 porshento, tin kosnan ku no ta sufisientemente aklará, pero den bista di e fiskal, no tin duda ku ta Koster, alias ‘Pollo’ i Jozef ta responsabel pa morto di Sharlstone Melfor Benito, esei por konkluí, basando riba deklarashonnan di testigu, imágennan di vidio i deklarashonnan ku e akusadonan mes a hasi anteriormente serka outoridatnan. Pa loke ta trata e asesinato di Benito, riba e imágennan di vidio ta mira kon na sierto momento dos persona ta para un outo blanku, marka KIA i kaba lòs balanan dirigí riba un di esnan den e vehíkulo. Frankamente bisá e kalidat di e vidio ta poko krekeché, pero segun fiskal e dos personanan den akshon ta nada otro sino Koster i Jozef. Un persona ku tambe tabata den outo (shofùr/ prima Sint Jacoba) a deklará di a mira ku ta Koster i Jozef a kometé e akto kastigabel.

Abogado señora mr. A. M. Tromp sinembargo a habraká e akusashonnan di parti di Ministerio Públiko, argumentando ku no tin pruebanan kontundente kontra su kliente, hopi kos ta basá riba rumor i deklarashonnan kontradiktorio. Un monton di duda a keda ekspresá riba e materialnan ku Ministerio Públiko a uza komo prueba. Parse ku na e sitio a haña tambe restu di balanan ku no ta kuadra ‘at all’ ku e armanan ku lo a keda uzá. Abogado mr. Loth a para ampliamente ketu na e sirkunstansia den e bario Seru Fortuna, kon kada biaha durante kualke partido di futbòl, arma di kandela ta zona sin mizerikòrdia den e bario. Tin konstante tiramentu ku arma di kandela den laira i ta p’esei ta difísil uza sierto munishon optené komo prueba. Parse ku lo mester tabatin un persona mas envolví, pero e punto akí no a bini ku tantu énfasis padilanti

Pa loke ta trata e situashon personal di e akusadonan, lo siguiente. E akusado Koster, kende ta biba na Ulanda (na Den Haag), a keda deskribí komo un persona sumamente difísil i kompliká, ku na vários okashon a hañ’é den man di hustisia, sea pa atrako, violensia doméstiko i òf maltrato. Na aña 2024 el a keda kondená ku un kastigu di trabou pa violensia doméstiko, na aña 2022 el a keda sentensiá pa 3 aña pa atrako i na aña 2019 pa maltrato, na aña 2018 violensia públiko, na aña 2017 pa kumpra òf bende kosnan hòrtá (ekstorshon). Koster no a koperá pa laga sikiater atendé kuné. Pero a konstatá ku e tin un nivel di inteligensia di un sierto promedio aseptabel, ademas el a demostrá karakterístikanan asosial i narsista, komportando sumamente agresivo i violento. Tin chèns ku e tipo di aktonan akí por ripití den e kaso di Koster.

E akusado Jozef ta konsiderá un firstoffender, pero kende den pasado a hañ’é ku kaso di destrukshon i maltrato pa djei kai bou di guia di Reclassering hubenil, ku no a duna resultado.

Fiskal finalmente a pidi pa ámbos akusado un kastigu di prizòn di 14 aña. Maske e akusado Jozef tabatin 17 aña na  momento di a kometé e asesinato, fiskal a preferá pa duné un kastigu muchu mas pisá, esta mas bien pa hende grandi. Fiskal ta sali for di e punto di bista ku ta Jozef a asesiná Benito. Pero tambe su komportashon den sala di korte, totalmente sin kompashon a hunga un ròl den e desishon di fiskal.

Durante tratamentu di e tipo di kasonan akí awendia, kaminda hóbennan ta metí i kaminda hasta un otro siudadano a keda asesiná, ta reina un ambiente seku, ‘cool’ i di paramentu fuerte den kada sapatu, sin demostrá ningun klase di konsiderashon i òf remordimentu. Tin tur rason pa profundisá den loke ta pasando i ku a kuminsá parse un kultura nobo ku ta drentando Kòrsou pa bira e forma rígido kon nos hóbennan ta anda ku otro. Apénas 19 aña Sharlstone Benito tabatin, ku ya otro hóbennan (di 17 i 26 aña) a haña ku mester pone un fin na su bida. Ningun pia di palabra di parti di e akusadonan pa bisa kiko a pasa presis ku a kondusí na e likidashon aki. E relato aki, presentá pa nos di Clarity Media, apsolutamente no ta pa keda presentá manera un pelíkula yen di suspenso i tenshon., pero ta mas bien un yamada. Tur dirigente di e isla aki, grandi i chikí, hòmber i muhé, mester tuma na serio loke ta pasando i yuda harma trayektonan pa atendé di formanan efektivo ku loke ta pasando na Kòrsou bou di nos hendenan.

Promé ku klousurá tratamentu di e kaso, demanda pa daño i perhuisio a subi mes, pa ta eksakto pa Melfor (tata)  CG 2682, 59, Benito (mama) CG 6427, 42 i pa Sint Jacoba (prima/ shofùr) CG 20.000,–.

Wes. mr. W. Foppen na final di tratamentu di e kaso a keda ku dia 27 di mei binidero lo dikta sentensia. Tin spekulashon ku kisas lo trata di un ‘tussen vonnis’, di manera ku korte lo pidi pa hasi mas investigashon.

.