WILLEMSTAD— Un kaso ku a yama bastante atenshon ta esun di e siudadano di fam Valentijn (47 aña di edat). Den sala di korte Valentijn a presentá djaluna 4 di mei 2026, akusá di a transportá 5340 gram di kokaina riba 27 di sèptèmber 2025. E akusado aki tabata sintá den un ‘rolstoel’ ku su pianan sumamente hinchá (kargá ku ‘vocht’), prueba ku su salú ta problemátiko.

Valentijn ta un siudadano ku mester dialisá algun biaha pa siman i ta riba lista di espera pa transplantashon di nir na Ulanda. Na Kòrsou e sirkunstansia pa e akusado su enkarselashon no ta posibel i esei ta loke dirèkt na kuminsamentu di tratamentu di su kaso a bini padilanti atraves di su abogado señora mr. Eisden. Mesora a sita un dokumento médiko ku a indiká ku den prizòn na Koraal Specht e sirkunstansia no ta adekuá pa enkarselashon di e siudadano aki. 

Pues, Valentijn no ta drenta prizòn, e no ta keda enkarselá, ounke e ta metí den transportashon di 5340 gram di kokaina riba 27 di sèptèmber 2025. Ni sikiera un kastigu di trabou no ta posibel den su kaso. Korte simpelmente mester aseptá e realidat aki, komo tal e kondena ku wes a dikta a bira 200 dia di prizòn di kua 193 dia kondishonal, deskitando e 7 dianan ku el a pasa den aresto preventivo kaba, pero mará na un periodo di prueba di 3 aña. Wes mr. Sigmar Carmelia abiertamente a ekspresá e deseo ku e akusado lo no hasi maluzo di su situashon di salú problemátiko pa kontinuá den fechoria. Echo ta ku e akusashonnan kontra di Valentijn ta legalmente i konvinsentemente probá. Lo weta te kon leu por hasi uzo di e rekomendashonnan di Reclassering.