WILLEMSTAD— Segun e akusado di fam Garia (53 aña di edat) ta pasobra e tabata mal enamorá di Maria, el a pone pakete ku droga riba pòst. E akto kastigabel aki a sosodé dia 24 di yanüari 2025 ya ku riba e dia menshoná e akusado Garia a pone riba pòst un pakete ku a kontené 27 gram di kokaina, hasiendo Maria un fabor.

Di akuerdo ku e splikashon di Garia den sala di korte djaluna 4 di mei 2026, e no tabata sa ku tabatin droga den e pakete, el a pensa ku e kontenido tabata lipstick i otro ingredientenan pa kutis. Maria, segun Garia ta un damita latinoamerikana bibá den Skalo, kende ta ilegalmente na Kòrsou, pero ku e (esta Garia) ta lokamente enamorá di dje.

Pero, segun fiskal señora mr. K. Hara a mira den telefòn ku Garia tabatin kontakto telefóniko ku e siudadano Welvaart, kende den bista di hustisia ta konsiderá un trafikante firme den droga ku ta organisá transportashon di droga. Ta sospechá ku ta riba enkargo di Welvaart, Garia a pone e droga riba pòst i ku e historia di un tal Maria, kende Garia lo a hasi un fabor, ta puru fantasia. Pa kolmo Garia ta un residivista, kende den pasado resien mes a keda kondená pa hustisia. E akusado Garia no por a presentá ningun informashon konkreto di Maria, nada di identidat, nada di adrès òf otro pruebanan aseptabel. Fiskal a demandá un kastigu di prizòn di 12 luna di kua 6 luna kondishonal, mas un periodo di prueba di 3 aña.  Wes señora mr. van Rijssen a yega na e kastigu di prizòn di 8 luna di kua 4 luna kondishonal i un periodo di prueba di 3 aña. Wes tambe ta sali for di e punto di bista ku Garia ta parti di e grupo ku ta operá pa Welvaart den droga. Welvaart tampoko no ta un deskonosí di hustisia.