WILLEMSTAD— Djaluna 15 di yuni tabatin tratamentu di e kaso di un siudadano femenino ku a mafia hopi otro siudadano ku promesanan falsu i dudoso. E siudadano akí a bati tur rèkòrt na kurashi. Apénas e tin 33 aña di edat i ya e ta mama di 6 yu, anto vários biaha kaba e tabata den man di hustisia pa aktonan kastigabel kometé.

Pa kuminsá tin e biaha aki e akusashon ku durante e periodo 31 di òktober 2023 pa 21 di yanüari 2024 el a hòrta televishon i remote, wea i panchi pa kushiná, airfryer, sandwich toaster, rice-cooker, aparatonan elektriko pa kas, silender di gas etcetera, ku ta pertinensianan di e siudadanonan Valido-Sosa, Colpa i otronan.

Komo sifuera no ta basta durante e periodo 28 di mart 2023 pa 8 di mei 2024 Boekhouder a mafia siudadanonan di fam George, Aniceto, Melfor, Francisca, Engelhardt, Benjamin, Colpa, Mathilda, Bryan-Miller, Pandt i Winklaar na balor di 10.000 florin en total ku práktikanan di ladronisia astuto. Enfin, ta trata aki di un historia masha largu mes di komportashon robes pa kita plaka i merkansia for di otro siudadano.

E akusado akí su kaso a keda tratá den sala di korte djaluna 15 di yüni i ta remarkabel ku e mes no tabata presente. Fiskal señor mr. de Graaf a insistí ku tratamentu di su kaso lo kontinuá fuera di doño di kurpa, esta Boekhouder, su presensia. Abogado mr. Ulrich Dickens enkargá ku e defensa a splika ku el a hasi tur sorto di esfuerso pa drenta den kontakto ku su kliente Boekhouder, pero tur esfuerso tabata enbano.

Wes mr.P.M. Leijten tabata den splikashon amplio pa mustra ku e asuntu akí ta unu masha serio mes, komo tal segun wes mester envolví Reclassering pa duna guia profeshonal pa evitá ku pió lo sosodé den poko tempu atrobe. E punto ta ku Boekhouder a sinta un kastigu di prizon di 35 dia. Abogado mr. Dickens a logra pa gana mizerikòrdia di parti di korte pa e kliente aki, pero no por a evitá ku Boekhouder mester kai será atrobe, ademas mester paga esnan ku el a perhudiká nan plaka bèk. Wes mr. Leijten a konkluí na un kastigu di prizòn di 9 luna di kua 6 luna kondishonal. No tin sentido pa duna un kastigu di trabou, pasobra Boekhouder a hasi di mas kaba.