Marshe Rondo a habri despues di remodelashon

Di un maneho di krisis pa un base solido

WILLEMSTAD— Ku e apertura di Marshe Rondo den Punda, Fundashon Marshe ta sera un kapítulo eksigente i ta habri un nobo. E apertura ta e resultado visibel di un ruta di rekuperashon di diesocho luna, ku a hiba e fundashon for di un bashi di maneho, pa yega na kuentanan anual aprobá, relashonnan laboral regulá, un atministrashon digitalisá i un kartera di dosier di proyekto kla pa ehekushon pa su lokalidatnan di merkado.

Na yanüari 2025 Fundashon Marshe a keda sin konseho di supervishon i sin direktiva ya ambos a retira. A buska ing. Remy Ricardo irba un base interino, kende a asumi e funshon 21 di yanuari 2025. ‘E promé tarea no tabata planifiká, sino mira kla,” asina Ricardo ta bisa. Durante di e prome simannan a traha un mapa eksakto di unda e fundashon tabata pará,  e obligashonnan, e atrasonan, e sistemanan i e hendenan. A dokumentá i komuniká e análisis aki na e direktiva i Ministerio di Desaroyo Ekonómiko (MEO). Banda di esei a entrega un vishon pa e siguiente tres aña, ku ta kubri tantu e rekuperashon operashonal riba kòrto plaso komo e desaroyo stratégiko di e fundashon riba largu plaso.

Ricardo ta splika ku e ruta di rekuperashon a kuminsá ku dos prioridat, esta digitalisá e organisashon i pone e kontabilidat riba un base ku por responsabilisá. E tarea a bira konsiderablemente mas pisá na aprel 2025, ora un kandela den e ofisina temporal di Fundashon Marshe a destruí un parti sustansial di e atministrashon finansiero.

Ku un tim chikitu, e maneho interino a produsí e informenan anual pendiente di 2022, 2023 i 2024 den un aña. Despues di un kontrol severo, e akountentnan di e fundashon a aprobá tur tres. E konstatashonnan registrá den e informenan ei ta relashoná ku periodonan promé ku e maneho interino aktual. Den e di dos aña di e mandato, e informe anual di 2025 a keda kompletá i a risibí un deklarashon di aprobashon di e akountent, kuater informe anual den un periodo di un aña i mei.

Paralèl, tur asuntu di rekurso humano pendiente a keda resolvé. Kada empleado awor tin un kontrakt di trabou nobo i debidamente formalisá.

Fundashon Marshe ta atministrá Plasa Bieu, Barquitos, Plasa di Arte, Marshe di Otrobanda (inkluyendo Plaza Snack), Awasa i Marshe Rondo. Kada lokalidat a wòrdu analisá i, di akuerdo ku e kombenio di maneho ku MEO, a prepará i entregá dosier di proyekto kompleto:

Plasa di Arte: un mehoramentu pa e bendedónan, inkluyendo servisionan sanitario, un pòst di seguridat i kashinan.

Plasa Bieu: un dosier kompleto pa e nesesidatnan di mantenshon mayor di e lokalidat.

Marshe di Otrobanda: un dosier ku meta di protehá e propiedat i patrimonio kultural di e fundashon na Otrobanda; un proyekto ku mester kuminsá na tempu i ku fondo sufisiente pa por logra éksito.

Komo lokalidatnan turístiko i kultural den Willemstad, e sitionan aki ta keda kordiná tambe ku Curaçao Tourist Board. E dosiernan ta awor den man di e minister pa finansiamentu i ehekushon.

Fundashon Marshe ta prepará e lansamentu di su branding nobo, ku lo bin kompañá pa vários anunsio pa bendedó, hürdó i bishitante. Den e relashon entre e fundashon i su hürdónan lo introdusí un portal komersial, ku SENTOO komo e método di pago prinsipal, loke ta fortalesé e posibilidat pa kontrolá finansa di e fundashon i ta fasilitá konsiderablemente hasimentu di negoshi ku Fundashon Marshe.

Pa e motibu ei, e apertura di Marshe Rondo,  e lokalidat ku ta representá e mayor parti di e klientela di e fundashon, ta un komienso i un logro na mesun momento.