WILLEMSTAD – Den sala di korte a trata djaluna 18 di mei e kaso di e siudadano di fam Ferdinand, un dama kende tin 32 aña di edat. Ferdinand a keda akusá pa e hecho ku el a pone un pakete riba pòst ku despues a resultá di ta kontené 216 gram di kokaina. Segun e akusado, hasiendo un tal Gregg un fabor, el a kai kulpabel ku transportashon di kokaina. Den e pakete tabatin souvernir ku el a kumpra pa Gregg manda eksterior, pero despues Gregg a trese e pakete bèk pe pa pone riba pòst, pero a bin resultá ku tabatin droga den e pakete. Segun Ferdinand, e no konosé Gregg masha bon, di manera ku e no sa su nòmber kompletu ni su identidat.

Wes mr Leyten mesora a puntra e akusado si e no ta na altura di tur e kasonan di droga, kaminda ku hasimentu di fabor dor di pone paketenan riba pòst, siudadanonan sa kai será. Ferdinand ta mama di dos yu i kasi sigur e tambe lo kai será, wes a indiká na e akusado akí. E mester a sòru pa wak kiko presis ta kontenido di e pakete i no kore hasi kos pa loko ku awor ta duel e. Den mayoria kaso e kulpabelnan no ke  menshoná nòmber di esnan ku ta doño di e droga pa nan no haña nan den problema grandi. E deklarashonnan di Ferdinand a zona straño, hopi improbabel prinsipalmente pe hecho ku ta e akusado a kumpra e souvernir, duna Gregg pa empaketá, pero kende despues a bin trese e pakete bèk pa Ferdinand por a pone riba pòst.

Pakiko no ta Gregg mes a pòst e pakete, wes a puntra Ferdinand. E akusado no tabatin un kontesta aseptabel. E tipo di susesonan akí ta krea e persepshon ku kualke hende por gana plaka lihé, pero ta despues ku duana tene kòntròl, e problemanan ta bini na klaridat e wes a sigui splika. Ferdinand a deklará ku den pasado tambe el a manda paketenan pa eksterior. Abogado mr. Eisden a hasi e yamada pa preferibelmente duna e señora un kastigu di trabou i no mandé prizòn. Fiskal señora mr. K. Hara, tumando na konsiderashon e sirkunstansia di e señora, a demandá un kastigu di prizòn di 6 luna di kua 4 luna kondishonal i un periodo di prueba di 3 aña. Ta nifiká ku di tur manera Ferdinand lo kai será pa sikiera 1 luna. Ta keda na e akusado pa disidí si e ta bai den apelashon kontra di e sentensia.