WILLEMSTAD – Otro kaso tratá den sala di korte djaluna 18 di mei último ku a hala bastante atenshon ta esun kaminda Geertruida a deklará ku ta su partner a hinké den problema ku posiblemente e ta bai kai será pa droga. Geertruida ta fam di un mucha muhé di 23 aña di edat, kende dia 10 di desèmber 2025 a pone riba pòst un pakete ku despues a resultá di ta kontené 113 gram di kokaina. Polis a bai detené Geertruida na kas despues ku duana a kanta bingo pa motibu ku den e pakete a deskubrí kokaina. Segun e akusado Geertruida ta su partner a pidié hasié un fabor. Wes mesora a puntra Geertruida ku el a kòrda mustra e partner ku ta pa su falta e ta kai será. Den e pakete tabatin artefaktonan di uzo pa kabei manera borstel, skeiru i otro produktonan konosí, pero entre tur esaki tabatin kokaina skondí. Wes a puntra Geertruida kon e por a kore un riesgo asina fastioso. Pero e akusado a sigui bisa ku ta pa su partner el a hasi e fabor. A zona komo sifuera Geertruida tin hopi miedu di su partner, un persona kèns el a parse ku ta bou di gara total di su frei. Straño ta ku wes ni fiskal no a para ketu pa sigui puntra ken ta e partner di Geertruida. En todo kaso Geertruida ta un firstoffender.

E pakete tabata destiná pa Leeuwaarden (Ulanda) i tabata riba nòmber di Geertruida komo esun ku a mandé. Fiskal a demandá un kastigu di prizòn di 6 luna di kua 5 luna kondishonal pa e akusado, pero wes mr. Leyten a yega na un kastigu di prizòn 6 luna totalmente kondishonal,  mará na un kastigu di trabou di 120 ora, mas un periodo di prueba di 3 aña. Si Geertruida no kumpli ku e kastigu di trabou lo e bai será pa 60 dia.