WILLEMSTAD – E siudadano di fam Zimmerman, kende tin 26 aña di edat djarason 13 di mei a bolbe presentá den sala di korte ku e petishon pa skòrs su detenshon temporalmenrte. Motibu ku Zimmerman tabata será te asina leu ta debí ku outoridatnan a haña un arma di kandela dia 6 di febrüari  2026 den su outo. Ta trata akí di un pistol Pietro Berreta kaliber 9 x 19 mm ku 35 patronchi skèrpi, mas 2 lachi pa munishon.

Zimmerman, transportá for di prizòn di Koraal Specht, tabata den sala di korte den kompania di su abogado señora mr. Athena Sulvaran. Anteriormente, esta 28 di aprel tambe e tabata den sala di korte ku e mesun petishon pa lagué temporalmente den libertat, pero e petishon a keda rechasá den korte, pasobra wes a husga ku lo ta un shòk pa komunidat di Kòrsou si laga e akusado den libertat na e momento ei.

Entre tantu a pasa algun siman i a konstatá ku e investigashon no ta prosperando, ainda mester warda resultadonan di NFI foi Ulanda. Akí ta trata di pruebanan di DNA, ku lo tuma bastante tempu pa keda kla. Abogado mr. Athena Sulvaran a argumentá ku te na e momentonan akí no a logra Ministerio Públiko trese sufisiente prueba konkreto kontra di Zimmerman padilanti. Zimmerman a insistí ku no ta e ta doño di e arma di e kandela, ni e munishon ku a haña den su vehíkulo, e no sa apsolutamente nada di e arma di kandela. Mas aleu Zimmerman a deklará tambe ku el a duna un tal Tutu kabes di boto.

Wes señora mr. H.R Bracht a tene un pousa kòrtiku, retirá pa algun ratu for di den sala pa studia e kaso. Finalmente wes a bai di akuerdo pa laga Zimmerman temporalmente den libertat, mará na e kondishon ku Zimmerman lo sigui koperá ku hustisia pa garantisá kontinuashon di e investigashon. Tambe e akusado lo sòru pa presentá dia di tratamentu di e kaso akí riba kontenido den sala di korte i perkurá pa e no kometé ningun akto kastigabel durante e periodo su dilanti.