WILLEMSTAD— Centrale Bank van Curaçao en Sint Maarten (CBCS) a amplia su uso di stress test, konforme e rekomendashonnan di Fondo Monetario Internashonal (IMF) pa sigui mehorá monitoreo di riesgo den sektor finansiero. Stress test ta yuda CBCS mira kon e bankonan, kompanianan di seguro i fondonan di penshun lo presta den periodo di strès ekonómiko òf finansiero. E tèstnan akí ta usa diferente senario, for di kondishon ekonómiko normal te na situashon di strès pisá, pa mira ki efekto un shòk manera deterioro ekonómiko, volatilidat riba merkado finansiero òf desaster natural lo tin riba e institutonan finansiero. Esaki ta yuda CBCS detektá vulnerabilidat for di trempan i tuma medida di maneho na tempu pa salvaguardá stabilidat finansiero na Kòrsou i Sint Maarten. Pa sigui amplia i fortifiká su sistemanan di monitoreo, CBCS a introdusí stress test makroekonómiko. Esakinan ta sirbi pa evaluá ki efekto sierto desaroyo manera bahada den kresementu ekonómiko, oumento di desempleo i bahada den aktividat turístiko por tin riba e bankonan. Ademas, CBCS a introdusí tèst inisial pa fondo di penshun, ku lo sirbi entre otro pa evaluá riesgo relashoná ku disturbio riba merkado finansiero mundial i un posibel kaida di ekonomia lokal. Pa e kompanianan di seguro, e tèstnan inisial ta trata senario relashoná ku posibel desaster natural. E resultadonan di e tèstnan ta mustra ku por lo general, bou di strès normal òf moderá, e institutonan finansiero di e union monetario ta keda bastante resiliente. Na mes momento, e senarionan mas pisá ta laga algun vulnerabilidat sali na kla, spesialmente relashoná ku kalidat di aktivo, preshon di likides, desaroyo riba merkado i claim di seguro. Tambe, e tèstnan ta sirbi pa evaluá kuantu interkonekshon ta eksistí entre e diferente segmentonan di sektor finansiero i kon risiko lo por plama den sistema finansiero durante un periodo di strès. Maske e resultadonan ta indiká ku, generalmente, ainda e sistema finansiero ta resiliente, CBCS ta enfatisá ku mirando e oumento di insertidumbre den panorama mundial, ta esensial pa keda vigilá i hasi evaluashon di risiko a base di proyekshon. CBCS ta introdusí e tèstnan adishonal aki den kuadro di su esfuersonan pa sigui hisa nivel di su supervishon makroprudensial, kual ta e supervishon di parti di gobièrnu riba stabilidat di e struktura finansiero den su totalidat.

Nan ta basá riba e rekomendashonnan hasí durante e mishon di asistensia tékniko di IMF na 2025. Pa kumpli ku e rekomendashonnan di IMF riba tereno di transparensia, CBCS a publiká tambe e modelonan ku a usa den e tèstnan i kon a formulá esakinan, den e Informe di Stabilidat Finansiero (FSR) di 2026. CBCS lo sigui refiná su instrumentonan pa monitoriá stabilidat finansiero, ku mas stress test, mihó kolekshon di dato i medida di maneho spesífiko, pa asina kontribuí na resiliensia di e sistema finansiero na Kòrsou i Sint Maarten.