Ta reina e persepshon serka hopi siudadano di e isla aki ku plaka ta bini na promé lugá pa por logra adelanto i progreso den nos komunidat. Pero, segun mi, mester ta kouteloso ku ponensianan asina, pasobra frankamente bisá, plaka sin un meta, sin un vishon na unda ke bai ku e isla aki, lo trese kuné ladronisia, desperdisio i mal gastamentu di plaka na gran eskala. Nos tin ehèmpelnan de sobrá pa ilustrá ku anda ku plaka ta rekerí di gobernantenan, sentido di responsabilidat, disiplina, anto tambe mester uza nan selebre i sòru pa e plakanan ta keda bon imbertí pa surti efektonan tangibel i útil pa komunidat.

Kiko a hasi ku e ganashinan brutu di offshore? Na unda tur e plakanan ei a bai? Ainda tin siudadanonan na Kòrsou ku ta broma ku offshore, pero no por splika ku luho i detaye ki BON offshore a hasi pa bienestar di e komunidat akí. Ta bini aserka ku a fia sumanan astronómiko di plaka fo’i Ulanda, anto tòg no a logra imbertí e plakanan ei di tal forma ku a lanta un grado haltu di desaroyo ku a subi kalidat i nivel di bida den hinter e komunidat kurasoleño. Ta teribel ku nos komo pueblo di Kòrsou a bin resultá den un debe asina grandi na Ulanda, sin ku e pais aki a probechá realmente. Pero, pa kuminsá gobernantenan no mester tin e deseo i ambishon ku ta nan mes, nan famia, amigu i kompinchinan so mester bai dilanti i progresá den bida, sino mester kòrda kontinuamente ku nan tei pa sirbi pueblo di Kòrsou, dunando mihó di nan kapasidat i konosementu pa por logra ku Kòrsou ta bai dilanti. Gobernantenan simplemente mester a pensa adelantá kon ta kuminsá harma plannan ku ta kondusí na desaroyo duradero. Kua ta e método(nan) mas apropiá òf ta for di kua ángulo(nan) mester sali?

Na Kòrsou samsam ku desaroyo general di e teritorio kurasoleño, mester di atenshon spesial i spesífikamente pa barionan i regionnan di e isla aki. Den e kuadro aki lo mi ke hasi menshon di bario komo instrumento pa desaroyá Kòrsou, esei ke men ku mester tin stipulá kon ta ban hasi den nos barionan i kiko ta e puntonan di prioridat pa logra i garantisá un grado haltu di higiena i sirkunstansia saludabel (konservando nos medioambiente i naturalesa), infrastruktura adekuá ku ta inkluí provishonnan ku ta fasilitá sirkunstansia di bida den kada bario, siguridat den tur nos áreanan di bida, duna partisipashon na grandi i chikí den nos pais. Ke men mester krea un mentalidat nobo si ta trata di gobernashon na Kòrsou. No un sistema ku ta obligá kada siudadano pa wak solamente pa su mes, anto mayoria biaha a kosto di un otro!!