CBCS ta honra kualifikashon históriko di Kòrsou pa Mundial ku dos moneda konmemorativo

WILLEMSTAD – Banko Sentral di Kòrsou St. Maarten (CBCS) ta emití dos moneda konmemorativo pa marka kualifikashon di selekshon nashonal di futbòl di Kòrsou pa Mundial 2026. Ta trata di un moneda di plata di Cg 5.00 i un moneda di sirkulashon di Cg 0.50.

Medio kampista di e selekshon nashonal di Kòrsou Juninho Bacuna, i eks entrenadó prinsipal Dick Advocaat, bou di kende Kòrsou a kualifiká pa Mundial 2026, a realisá e promé golpe seremonial di e moneda di plata di Cg 5.00 awe mainta na Koninklijke Nederlandse Munt (Royal Dutch Mint) na Houten. E moneda konmemorativo di Cg 0.50 ta produsí pa Royal Canadian Mint. Tur dos moneda lo ta disponibel pa kumpra i lo drenta den sirkulashon mas despues e luna aki.

Selekshon nashonal di futbòl di Kòrsou a marka historia na momentu di a kualifiká pa Mundial 2026 pa promé biaha, i asina a bira e pais di mas chikí segun kantidat di habitante, ku a logra e meta aki. Ku e logro eksepshonal aki, Kòrsou sigurá tambe su lugá den Guinness Book of Records. Emishon di e moneda konmemorativo aki ta sirbi komo un tributo palpabel na e momento históriko aki. E monedanan ta destiná komo un símbolo duradero di orguyo nashonal i un rekordatorio di e momento ku Kòrsou a tuma su lugá riba e esenario mundial.

Tur dos moneda ta mustra e ola blou poderoso, silueta di e hungadónan komo tributo na nan dedikashon i determinashon, e streanan di bandera di Kòrsou reflehando identidat di nashon, i naturalmente e bala di futbòl, ku ta e kurason di e logro históriko aki.

Bosero di CBCS sra. Nancy van der Wal a bisa ku e Blue Wave no solamente a konkista e tereno di futbòl: ‘Blue Wave tambe a toka kurason di hende i asta a pasa e portanan di Banko Sentral. Inmediatamente nos a sa ku nos no por a laga e momento aki pasa sin kreá algu konmemorativo i permanente. P’esei CBCS a tuma e inisiativa pa inmortalisá e okashon speshal aki ku dos moneda konmemorativo.”

E promé golpe a tuma lugá den presensia di Wouter Jansen, gerente di selekshon di Kòrsou na Federashon Futbòl Kòrsou (FFK); Kees Jansma, ofisial di prensa di FFK; Bert van Ravenswaaij, Direktor i Mint Master na Royal Dutch Mint; i Danielle Ranzijn, Senior Project Manager na Royal Dutch Mint.

E moneda di plata di Cg 5.00 lo ta disponibel pa un preis di benta di Cg 175.00. E moneda di sirkulashon di Cg 0.50 lo keda distribuí via bankonan komersial na Kòrsou i tambe lo ofresé den un empake speshal pa kolekshonista na CBCS, brindando un oportunidat úniko pa poseé un rekuerdo permanente di e logro históriko aki.